ԵՐԵՎԱՆ, 11 հոկտեմբերի — Sputnik. Պաշտպանության նախկին նախարար, Մարտի 1-ի գործով մեղադրյալ Միքայել Հարությունյանի նախկին տեղակալին հրավիրել են Ապրիլյան պատերազմի հանգամանքներն ուսումնասիրող քննիչ հանձնաժողով։ Գրում է «Հայկական ժամանակը»։
Ըստ թերթի` վերջինը շատ կարևոր տեղեկություն է տրամադրել հանձնաժողովին։
«Բոլորին հրավիրելու ենք մեր հաստատած ցանկով, դեռ մի բան էլ ավելի: Ես չեմ պատկերացնում՝ ինչպե՞ս կարելի է մերժել մի հանձնաժողվի հրավերը, որը միտված է դեպքերն ուսումնասիրելու»,- թերթի փոխանցմամբ` ասել է հանձնաժողովի նախագահ Անդրանիկ Քոչարյանը։
Նա նաև նշել է, որ նույնիսկ Սերժ Սարգսյանին է ակնկալում հրավիրել ու մերժում չստանալ։
«Նույնիսկ ակնկալել եմ, որ պաշտպանության նախկին նախարար Միքայել Հարությունյանը, եթե Մարտի 1–ի գործով լքեց Հայաստանը, ապա Ապրիլյանով ինքը պետք է ձև գտնի՝ հանձնաժողովի հետ կոնտակտ կարողանա ապահովել, չգիտեմ, տեխնիկական ինչ-որ միջոցներով՝ սկայպով, որովհետև հարցեր կային, որ իրեն էլ պետք է ուղղեինք, քանի որ Միքայել Հարությունյանն այդ ժամանակ նախագահին առընթեր գլխավոր ռազմական տեսուչն էր»,– ասել է Քոչարյանը։
Որտե՞ղ էր Խաչատուրովը ապրիլյան քառօրյայի առաջին րոպեներին. պատասխանում է Դավթյանը
Հանձնաժողովը դիմել է ԱԱԾ` թոշակի անցած զինվորականներից գաղտնի տեղեկություններ ստանալու իրավունք տալու հարցով։ Այդ ցուցակում են պաշտպանության նախկին նախարար Վաղարշակ Հարությունյանը և ռազմական գործիչ, գեներալ-մայոր Վլադիմիր Հայրապետյանը:
