ԵՐԵՎԱՆ, 8 հոկտեմբերի — Sputnik. Քիմ Քարդաշյանը վերջնականապես որոշել է. մարմնի թերությունները թաքցնող հագուստի նոր շարքը հենց Հայաստանում է արտադրելու։ Դա նրա երազանքն է։ Այս մասին հեռուստաաստղը հայտարարել է WCIT 2019–ի շրջանակում հայ լրագրողների հետ զրույցում։
«Դա իսկապես շատ կարևոր է ինձ համար։ Ինձ շատ է դուր գալիս աշխատել Հայաստանում գտնվող ընկերությունների հետ։ Այստեղ արտադրություն բացելը իմ երազանքն է։ Բայց եթե չստացվի` կմտածենք մեկ այլ բանի մասին»,–ընդգծեց Քիմը։
Նրա խոսքով` առաջին բանակցությունները խոշոր հայ ներդրողների հետ կկայանան արդեն այսօր երեկոյան։
«Այժմ փորձում ենք հասկանալ, թե ինչ հարմար գործարաններ կան»,–ասաց նա։
«Աշխարհում այլ տեղ չկա, որտեղ հիմա կցանկանայի լինել». Քիմ Քարդաշյանը` Երևանում
Սակայն, դատելով ամեն ինչից, ներքնազգեստով գործը չի սահմանափակվի։ Պատասխանելով այն հարցին, թե արդյո՞ք նա մտադիր չէ Հայաստան «բերել» նաև իր կոսմետիկ շարքը, Քիմը պատասխանեց, որ նման հնարավորությունը չի բացառում։ Ասաց` կցանկանար ընդլայնել բիզնեսն ու այն ինտերնացիոնալ դարձնել բառի ամենալայն առումով։
«Դա իմ նպատակներից մեկն է։ Շատ հուզիչ է այսօր այստեղ լինելը։ Ես կհանդիպեմ բազմաթիվ շատ կարևոր մարդկանց հետ, հիրավի խոշոր ներդրողների։ Եվ շատ ուրախ եմ ինձ բաժին հասած հնարավորության համար»,– եզրափակել է Քիմը։
Քիմ Քարդաշյանը ելույթ է ունենում Երևանում
Նշենք, որ Քիմ Քարդաշյանի երևանյան այցի հիմնական նպատակը մասնակցությունն է WCIT –2019 23-րդ համաժողովին։ «Գաղափարների շուկա» լիագումար նիստի շրջանակում նա հանդես է եկել «ԶԼՄ–ների, լրագրության և արվեստի վրա ժամանակակից տեխնոլոգիաների ազդեցության մասին» զեկույցով։ Ակնկալվում է, որ հաջողակ գործարարը Հայաստանում անձամբ կուսումնասիրի տեղական շուկան։
