ԵՐԵՎԱՆ, 4 հոկտեմբերի — Sputnik. ՀՀ ոստիկանության զորքերի նախկին հրամանատար Լևոն Երանոսյանը չի ընդունել իրեն առաջադրված մեղադրանքը և կարծում է, որ արդարացվելու է։ Այս մասին լրագրողների հետ զրույցում ասաց Երանոսյանը` իր դեմ հարուցված քրգործով դատական նիստից առաջ։
«Ինձ առաջադրված մեղադրանքն էլի չեմ ընդունում։ Ես արդար մարդ եմ ու կարդարացվեմ»,–ասաց նա։
Հարցին, թե ինչով է զբաղվում հիմա, Երանոսյանը զարմացավ` թոշակառուներն ինչո՞վ են զբաղվում։
Նկատառմանը, թե կարող է և այգի է խնամում, Երանոսյանը ծիծաղով արձագանքեց` այո՛, այգի է խնամում։
Լրագրողները հետաքրքրվեցին` Երանոսյանը տեղյա՞կ է, թե ինչու Հայաստանի նախկին ոստիկանապետ Վալերիյ Օսիպյանը դուրս եկավ իրավական համակարգից։ ՀՀ ոստիկանության զորքերի նախկին հրամանատարը պատասխանեց, թե չգիտի. քաղաքականությամբ ո՛չ զբաղվում է, ո՛չ էլ հետաքրքրվում։
Երանոսյանն է որոշել ինչի վրա պիտի ոստիկանները ծախսեն փողերը. հարուցվել է նոր քրեական գործ
Հիշեցնենք, որ Երանոսյանը մեղադրվում է պաշտոնեական լիազորությունները չարաշահելու համար։ Ըստ քրեական գործի նյութերի` նա, չունենալով լուսաձայնային հատուկ միջոցներ ստանալու և անձամբ գործադրելու լիազորություն, 2018–ի ապրիլի 16-ին և 22-ին` Երևանում բողոքի զանգվածային ակցիաների ժամանակ, ցուցարարների նկատմամբ գործադրել է 8 հատ «Զարյա» տեսակի լուսաձայնային նռնակներ, ինչի հետևանքով երկու տասնյակից ավելի անձինք են տուժել։ Հատուկ միջոցների գործադրման հետևանքով Բաղրամյան պողոտայում ծառայող ոստիկանության զորքերի զինծառայողներից 6 հոգի ստացել են մարմնական վնասվածքներ։
Այսօրվա դատական նիստը հետաձգվեց, քանի որ Երանոսյանի պաշտպանը չէր ներկայացել նիստին:
