ԵՐԵՎԱՆ, 2 հոկտեմբերի — Sputnik. Գազի սակագնի թանկացում ձմեռային ամիսներին չի լինի, քանի որ կա փոխադարձ հասկացվածություն, որ նման բան չի կարելի թույլ տալ։ Այս մասին ԱԺ–ում ասաց ՀՀ փոխվարչապետ Մհեր Գրիգորյանը` պատասխանելով ԲՀԿ–ական պատգամավոր Սերգեյ Բագրատյանի հարցին, թե ի՞նչ է լինելու գազի սակագնի թանկանալ-չթանկանալու հարցը։
Ռուսական կողմը պատրաստակամ է քննարկել գազի ներքին սակագների նվազեցման հարցը. ՀԾԿՀ նախագահ
«Այս պահին կոնստրուկտիվ ձևաչափով են ընթանում քննարկումները։ Չկա որևէ նշան, որը վկայում է այն մասին, թե հիմա ուղղակի ժամանակ է անցնում, որ հետո գազի սակագինը կտրուկ փոխվի։ Վստահ եմ` չենք ունենա իրավիճակ, որ դեկտեմբերին ստիպված լինենք հայտարարել, թե գազի սակագինը բարձրանում է»,–ասաց նա։
Ե՞րբ պարզ կլինի գազի սակագնի հարցը. փոխվարչապետը պատասխանել է լրագրողներին
Նա վստահեցրեց` չպետք է անհանգստանալ, որ հունվարից քաղաքացիներն ավել կվճարեն գազի համար, քանի որ անգամ եթե սակագնի փոփոխություն լինի, այն չի գործելու մեկ կամ երեք ամիս հետո։
Փոխվարչապետի խոսքով` գազի սակագնի հարցը բարդ է այն իմաստով, որ պարունակում է բազմաթիվ բաղադրիչներ, որոնք մանրամասն քննարկվում են բանակցություների ընթացքում։
«Մենք գազի սակագնի հետ կապված բանակցությունների պրոցեսը չենք դանդաղեցնում, ուղղակի ուզում ենք ֆունդամենտալ լուծումներ գտնել։ Մինչև տարեվերջ կունենանք բանակցությունների արդյունքի մասին վերջնական պատկերացում»,–ասաց նա։
Հիշեցնենք, որ երեկ Երևանում կայացած ԵԱՏՄ նիստի ավարտին, լրագրողների հետ հանդիպմանը ՀՀ վարչապետ Նիկոլ Փաշինյանը շեշտել էր, որ նիստի ժամանակ քննարկվել են նաև միության անդամ երկրներում բնական գազի տեղափոխման ու մատակարարման ոլորտում օրենսդրությունների համապատասխանեցման հետ կապված հարցեր։
