ԵՐԵՎԱՆ, 30 սեպտեմբերի — Sputnik. Հայաստանը, օգտագործելով իր աշխարհագրական դիրքը, պատրաստ է ջանքեր գործադրել ԵԱՏՄ մուտքը նոր շուկաներ ապահովելու համար։ Այսօր այս մասին ասաց ՀՀ վարչապետ Նիկոլ Փաշինյանը` ելույթ ունենալով «Եվրասիական աշխարհամասի տարանցիկ ներուժը» միջազգային համաժողովում։
Փաշինյանի խոսքով` ԵԱՏՄ նախագահության ժամանակ Հայաստանն առավելագույն ջանքեր է գործադրել խնդիրների լուծման դրական դինամիկա ապահովելու համար, որոնք կարող են լրացուցիչ խթան հաղորդել տնտեսական աճին և քաղաքացիների բարեկեցության բարձրացմանը։
«Այդ համատեքստում առանցքային ուղղություններից մեկը եվրասիական տրանսպորտային ենթակառուցվածքի զարգացումն է և դիվերսիֆիկացիան, որն ապրանքաշրջանառություն կապահովի ԵԱՏՄ ներսում, ինչպես նաև ապրանքների արտահանում արտաքին շուկաներ», – ասաց Հայաստանի վարչապետը։
«Հայաստանը ԵԱՏՄ-ում Սինգապուրի կարևոր գործընկերն է». Լի Սյեն Լու
Նրա կարծիքով` Իրանի, Վիետնամի, Չինաստանի և Սինգապուրի հետ ազատ առևտրի մասին համաձայնագրի ստորագրումը, ինչպես նաև Սերբիայի, Եգիպտոսի ու Հնդկաստանի հետ սպասվող համաձայնագրերի ստորագրումը թույլ կտան ոչ միայն ամրապնդել ԵԱՏՄ տնտեսական ներուժը` ապահովելով դրա լիարժեք ինտեգրացումը համաշխարհային տնտեսությունում, այլ նաև ընդլայնել աշխարհամասի տրանսպորտային միջանցքների աշխարհագրությունն ու տարանցիկ ներուժը։
