ԵՐԵՎԱՆ, 30 սեպտեմբերի – Sputnik. Մարտի 1-2-ի իրադարձությունների հետ կապված բոլոր անձինք պետք է վկայություններ տան ու պատասխանատվության կանչվեն։ Այսօր հրավիրված ասուլիսի ժամանակ այս մասին ասաց «Ժառանգություն» կուսակցության խորհրդի նախագահ Րաֆֆի Հովհաննիսյանը:
«Ովքեր մարտի 1-2-ի իրադարձությունների ժամանակ դաշտում էին, հրապարակում, փախուստի մեջ, տնային կալանքի տակ, իշխանական աթոռին, հետախուզվում էին, հետախուզում էին, զենք էին օգտագործում, բոլորը պետք է վկայություններ տան ու պատասխանատվության կանչվեն: Եթե դա կարողանում ենք անել, ուրեմն նոր Հայաստանում ենք, եթե չենք կարողանում, Նոր Հայաստանում չենք,– ասաց նա:
Հովհաննիսյանն անդրադարձավ նաև ՀՀ երկրորդ նախագահ Ռոբերտ Քոչարյանին կալանքի տակ պահելու փաստին։
«Մինչև հիմա դե ֆակտո ՀՀ երկրորդ նախագահին պահում են կալանքի տակ, բայց կարծես կոնկրետ սպանությունների հետ կապված փաստեր չկան, որոնց համապատասխան ինքը կալանքի տակ է։ Գուցե դրանք պահվում են կոնկրետ դատավարության համար, բայց ես հույս ունեմ, որ դրանք կան։ Այս հարցը պետք է իր տրամաբանական ավարտին բերվի», -ասաց Հովհաննիսյանը։
Քաղաքական գործիչը նոր իշխանության մեկուկես տարվա աշխատանքը գլոբալ առաջընթաց է համարում, բայց ըստ նրա` կան առանձին հարցեր, որոնք հարցականներ են հարուցում:
«Շատ բան դեռ կախված է Նիկոլ Փաշինյանի անձից, ու դա մտահոգություն է առաջացնում: Պարոն Փաշինյանը պետք է տարբերվի նախորդներից, քանի որ նա ճիշտ մարդն էր ճիշտ ժամին, բայց ապագայի համար պետք է հասկանա հանրակարգային, ինստիտուցիոնալ հավաքական պատասխանատվության համակարգ ստեղծելու անհրաժեշտությունը»,- ասաց նա:
Հովհաննիսյանի խոսքով` «Ժառանգության» կուսակցությունը ցանկանում է քաղաքականություն վերադառնալ` որպես քաղաքական երրորդ բևեռ։
««Ժառանգության» կուսակցությունը ոչ մի տեղ չի կորել, ուղղակի մենք եղել ենք քաղաքացիական նախաձեռնություն և սպասարկել ենք ազգի շահը»,- հայտարարեց նա:
Քոչարյանը Քոչարյանով, բայց նոր հարցերը հնարավոր չէ բարդել նախկինների վրա
Հիշեցնենք, որ 2018 թվականի հուլիսի 26-ին Մարտի 1-ի գործով Հատուկ քննչական ծառայությունում քննվող քրեական գործով Հայաստանի երկրորդ նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը:
Վանեցյանը կարող է լավ այլընտրանք լինել Փաշինյանի իշխանությանը. քաղտեխնոլոգ
