ԵՐԵՎԱՆ, 27 սեպտեմբերի – Sputnik, Արմենուհի Մխոյան. Արփի լճի հյուսիսարևմտյան հատվածում գտնվող, Վրաստանին սահմանակից Գառնառիճ համայնքն իր վայրի բնությամբ այնքան է գրավել Արմեն Իգիթյանին, որ նա 2 տարի առաջ որոշել է Գյումրուց տեղափոխվել գյուղ և կյանքի կոչել իր բիզնես գաղափարը` բնական նյութերից տուն կառուցել և դարձնել հյուրատուն։
«Նախկինում Գյումրու բնակիչ էի, հիմա` այս գյուղի: Որոշել եմ զբաղվել ֆերմերությամբ ու տուրիզմով: Այստեղ հանգիստ է, օդը` մաքուր, հնարավորություն էլ շատ կա: Առայժմ մենակ եմ գյուղ եկել, ընտանիքս հետո կտեղափոխեմ»,- Sputnik Արմենիային պատմեց Արմենը, որը մինչ Գառնառիճ տեղափոխվելը ուսումնասիրել է տարածքի գյուղերը և ամենաշատն այս գյուղն է հավանել:
![Ինչպես երիտասարդը Գյումրուց տեղափոխվեց գյուղ ու որոշեց ծղոտե հյուրատուն կառուցել Ինչպես երիտասարդը Գյումրուց տեղափոխվեց գյուղ ու որոշեց ծղոտե հյուրատուն կառուցել - Sputnik Արմենիա](https://cdn.am.sputniknews.ru/img/2055/51/20555127_0:0:1600:1200_600x0_80_0_0_9160171732f9772481fc647502319b12.jpg)
Գառնառիճի հին ու խալխված տների կողքին հիմա նա կառուցում է նորը՝ Հայաստանում դեռ նմանը չունեցող տեխնոլոգիայով։ Փայտե կոնստրուկցիայով, ծղոտե տան նախագծից մինչև շինարարական աշխատանք ու կահույք սեփական ձեռքերով է պատրաստում։ Շինարարության նորարարությունն այն է, որ կառույցի համար շինանյութ են ծառայում ծղոտն ու կավը։ Ամեն ինչ` բնական նյութերից։ Արմենը մտադիր է շինարարության ավարտից հետո տունը ևս կահավորել բնական նյութերով։
Նա որպես հումք օգտագործում է տարածաշրջանում աճեցրած հաճարի ծղոտները։ Հյուրատան համար օգտագործվել է 400 հակ ծղոտ։ Ասում է՝ հատուկ՝ հորիզոնական դասավորությունն ու շաղախը, որում նաև տուֆի փոշի է օգտագործվում, ոչ միայն մեկուսացնում են ցրտից ու շոգից, այլև ձայնամեկուսացում են ապահովում։
Երիտասարդը վստահ է` խստաշունչ ձմեռ ունեցող տարածաշրջանի համար այս տեխնոլոգիան շատ լավն է ու կարող է ջերմամեկուսացում ապահովել անգամ մինչև 45 աստիճան ցրտին։
«Հետագայում նաև նպատակ կա էկոտուրիզմի զարգացման համար բնական մթերքներով սնունդ ապահովել հյուրերի համար, տարածքում ձիարշավներ և սիրողական ձկնորսություն կազմակերպել: Այս հյուրատնից կօգտվեն նաև համայնքի բնակիչները. կիրացվի նրանց սնունդը»,- ասաց Արմենը։
Հիմա նա 2 տուն է կառուցում, յուրաքանչյուրը` 6 մարդու համար: Տեղադրվելու են արևային վահանակներ և ջրատաքացուցիչներ:
Մաքուր օդ ու բնություն. ամռանը` զով, ձմռանը` առատ ձյուն, ու այս ամենի կողքին՝ բնական նյութերով կառուցված հյուրատուն։ Երիտասարդը վստահ է, որ թե՛ ձմեռային, թե՛ ամառային զբոսաշրջության սիրահարները գոհ կհեռանան էկոտներից, մանավանդ որ բնությունն ու Արփի լիճն էլ իրենց գեղեցկությամբ կգայթակղեն Գառնառիճում հայտնվածներին։
Շինարարական աշխատանքներն արդեն ավարտման փուլում են, այնպես որ հենց այս ձմռանն էլ պատրաստ կլինեն դիմավորել զբոսաշրջիկներին։
Արմենը նախաձեռնությունն իրականացնում է ՄԱԿ-ի Զարգացման ծրագրի (ՄԱԶԾ) հայաստանյան գրասենյակի կողմից իրականացվող «Ինտեգրված գյուղական զբոսաշրջության զարգացում» ծրագրի համաֆինանսավորմամբ։
![Գառնառիճում կառուցվող տան կոնստրուկցիան Գառնառիճում կառուցվող տան կոնստրուկցիան - Sputnik Արմենիա](https://cdn.am.sputniknews.ru/img/2055/51/20555122_0:32:1601:1038_600x0_80_0_0_b626073b2d72784ba502f760a797f2df.jpg)
![Գառնառիճում կառուցվող տան կոնստրուկցիան Գառնառիճում կառուցվող տան կոնստրուկցիան - Sputnik Արմենիա](https://cdn.am.sputniknews.ru/img/2055/49/20554980_0:48:1601:1054_600x0_80_0_0_fc416e655520f770c37d2158c67735c7.jpg)
![Ծղոտե հյուրատան սենյակներից, Գառնառիչ, Շիրակի մարզ Ծղոտե հյուրատան սենյակներից, Գառնառիչ, Շիրակի մարզ - Sputnik Արմենիա](https://cdn.am.sputniknews.ru/img/2055/49/20554948_0:194:1600:1199_600x0_80_0_0_54a6e977dcbc5d72725dfcbe4fadb73c.jpg)
![Ծղոտե հյուրատան սենյակներից, Գառնառիճ, Շիրակի մարզ Ծղոտե հյուրատան սենյակներից, Գառնառիճ, Շիրակի մարզ - Sputnik Արմենիա](https://cdn.am.sputniknews.ru/img/2055/49/20554942_0:0:1600:1006_600x0_80_0_0_ed33be5b7f42b7509cce7dee02c14ba7.jpg)
![Ծղոտե հյուրատուն Գառնառիճում, Շիրակի մարզ Ծղոտե հյուրատուն Գառնառիճում, Շիրակի մարզ - Sputnik Արմենիա](https://cdn.am.sputniknews.ru/img/2055/49/20554934_0:83:1600:1089_600x0_80_0_0_138b9f2881bc8251715c563d5e6797fb.jpg)
![Արմեն Իգիթյան, Գառնառիչի ծղոտե հյուրատուն կառուցելու գաղափարի հեղինակ Արմեն Իգիթյան, Գառնառիչի ծղոտե հյուրատուն կառուցելու գաղափարի հեղինակ - Sputnik Արմենիա](https://cdn.am.sputniknews.ru/img/2055/49/20554929_0:42:1601:1048_600x0_80_0_0_a5cbae94ef6167c73bf57632798683a8.jpg)
![Ծղոտե հյուրատուն Գառնառիճում, Շիրակի մարզ Ծղոտե հյուրատուն Գառնառիճում, Շիրակի մարզ - Sputnik Արմենիա](https://cdn.am.sputniknews.ru/img/2055/49/20554922_0:115:1601:1121_600x0_80_0_0_5fe4fbd5f00025223f900d55ffeaddfb.jpg)
![Գառնառիճ, Շիրակի մարզ Գառնառիճ, Շիրակի մարզ - Sputnik Արմենիա](https://cdn.am.sputniknews.ru/img/2055/47/20554799_0:64:1600:1070_600x0_80_0_0_d87a9cff0d1a0b35f8380c0314cdf94e.jpg)
![Արփի լիճ, Գառնառիճ, Շիրակի մարզ Արփի լիճ, Գառնառիճ, Շիրակի մարզ - Sputnik Արմենիա](https://cdn.am.sputniknews.ru/img/2055/47/20554779_0:99:1600:1105_600x0_80_0_0_a6202db58d870ac3f13666c36324a2a4.jpg)