ԵՐԵՎԱՆ, 20 սեպտեմբերի – Sputnik. Երևանի ընդհանուր իրավասության դատարանը Մարտի 1-ի գործով մեղադրյալ Սեյրան Օհանյանին թույլատրեց բուժում ստանալ Գերմանիայում։ Օհանյանի պաշտպան Ինեսա Պետրոսյանը միջնորդություն ներկայացրեց դատարանին` հայտնելով, որ իր պաշտպանյալը առողջական նպատակներով երկրից բացակայելու կարիք ունի։
«Երկու տարին մեկ պարոն Օհանյանը պարտադիր բուժզննում է անցնում գերմանական կլինիկայում` իր հաշմանդամության և պրոթեզավորման հետ կապված։ Մենք ներկայացնում ենք դատարանից կլինիկայից ուղարկված հրավերը, որտեղ նշված է, որ Օհանյանին սպասելու են հոկտեմբերի 21-ին», – մանրամասնեց պաշտպանը։
Դատարանը բավարարեց միջնորդությունը` թույլ տալով, որ հոկտեմբերի 18-ից նոյեմբերի 4-ը Սեյրան Օհանյանը բացակայի Հայաստանից և մեկնի բուժման Գերմանիա։
Ռոբերտ Քոչարյանի պաշտպանները ինքնաբացարկ կհայտնեն դատավորին
Հիշեցնենք, որ Օհանյանին «Մարտի 1-ի» գործի շրջանակում մեղադրանք է առաջադրվել սահմանադրական կարգը տապալելու հոդվածի հատկանիշներով:
