ԵՐԵՎԱՆ, 19 սեպտեմբերի — Sputnik. ՀՀ վարչապետ Նիկոլ Փաշինյանը պաշտպանության նախարարությանը հանձնարարել է ցուցակագրել նաև այն զինծառայողներին, որոնք զոհվել են մարտական հերթապահության ժամանակ` օգնություն տրամադրելու համար։ Այս մասին կառավարության առջև բողոքի ակցիա անող զոհված զինծառայողների մայրերի հետ զրույցում ասաց Փաշինյանը։
Նշենք, որ զոհված զինծառայողների մայրերը բողոքի ակցիա են անում` ասելով, որ իրենց պահանջները գրավոր տեսքով սեպտեմբերի 11-ին ներկայացրել են կառավարություն, սակայն մինչև հիմա պատասխան չեն ստացել: Նրանք պահանջում էին հանդիպել Փաշինյանի հետ, որն էլ մոտեցավ նրանց։ Զոհված զինծառայողների ծնողները կարծում են, որ անարդար է` պետությունը փոխհատուցում է 2008–ից հետո զոհվածների ընտանիքներին, իսկ մինչ այդ զոհվածների ընտանիքներին գումար չի տրամադրվում։
«Մեր խնդիրն է, որ «Զինծառայողների ապահովագրության հիմնադրամը» նաև 1990–ականներին զոհվածների ընտանիքներին փոխհատուցի, սակայն դրա համար գումարներ են պետք։ Դրա համար պետք է աշխատատեղերը գրանցվեն, իսկ այս տարի նոր գրանցված 65 000 աշխատատեղ ունենք։ Բացի այդ, ես իմ ասուլիսի ժամանակ էլ ասացի, որ հիմնադրամի վճարումներն ավելանալու են։ Ես` որպես վարչապետ, ամաչում եմ, որ այսքան ժամանակ ձեր խնդիրը չի լուծվել, ես ներողություն եմ խնդրում»,–ասաց նա։
Հայաստանում կանցկացվի աննախադեպ մասշտաբի զորահավաք
«Զինվոր» համակարգող խորհրդի նախագահ Մարգարիտա Խաչատրյանը հայտնեց, որ արդար չէ, երբ Մարտի 1–ին` «փողոցում զոհվածների» ընտանիքներին գումար են տալիս, իսկ կռվի դաշտում զոհվածներին` ոչ։
Ի պատասխան վարչապետն արձագանքեց` ասելով, որ չէր ուզի փոփոխություններ տեսնելիս մարդիկ ասեին` բա մեր խնդիրն ինչու չի լուծվում, մյուսներինը լուծվում է։
Հայտնի է` ովքեր կփոխարինեն Վանեցյանին ու Օսիպյանին
Փաշինյանը հայտնեց, որ երկու օր անց ԱՄՆ է մեկնելու, որտեղից վերադառնալուց հետո կհանդիպի զոհված զինծառայողների մայրերի հետ։ Փաշինյանը հեռացավ, իսկ զոհված զինծառայողների մայրերը նշեցին, որ դժգոհ մնացին նրա հետ հանդիպումից, և չեն պատրաստվում լքել կառավարության բակը։
