ԵՐԵՎԱՆ, 16 սեպտեմբերի - Sputnik. ՀՀ վարչապետ Նիկոլ Փաշինյանը դեռ չի որոշել` ում է նշանակելու Ազգային անվտանգության ծառայության տնօրենի պաշտոնում։ Այս մասին Փաշինյանն ասաց այսօր` Վանաձորում տեղի ունեցող իր մամուլի ասուլիսի ժամանակ։
«Կան մի քանի թեկնածուներ, կքննարկենք ու որոշում կկայացնենք»,–ասաց նա։
Լրագրողները հետաքրքրվեցին, թե Վանեցյանի հայտարարությունն արդյո՞ք քննադատություն է իր ղեկավարման հանդեպ, ինչին ի պատասխան Փաշինյանը նշեց, որ սովորաբար արձագանքում է հայտարարություններին, որոնք անձամբ կարդացել է։
Վանեցյանն ազատվում է պաշտոնից. Փաշինյանը մանրամասներ է հայտնում
«Վանեցյանը փաստացի արդեն պետական պաշտոնյա չէ և կարող է հանգիստ ցանկացած հայտարարություն անել։ Ես կկարդամ այն, եթե հավելելու, մեկնաբանության կարիք լինի, կանեմ»,–նշեց նա:
Հիշեցնենք, որ Վանեցյանը հայտնել էր, որ պետականաշինության տրամաբանության շրջանակներում որոշումների տարերայնությունը, գործողությունների հախուռնությունը, առաջնայինը երկրորդականից, իսկ անցողիկը մնայունից չտարբերելու գործելաոճն այն ճանապարհը չէ, որը տանում է դեպի նպատակների իրականացում։ Այն, ըստ նրա, ընդհանուր ոչինչ չունի սպայի արժանապատվության հետ. սպայի ուսադիրն ու զարգացումների նման ընթացքն անհամատեղելի են։ Վանեցյանը նշել է, որ թող իր հրաժարականը լինի «Կանգ ա՛ռ»-ի սթափեցնող քայլ, մնացած բոլոր տարբերակներում կհաղթանակի հայրենիքի հանդեպ պարտքը։
