ԵՐԵՎԱՆ, 16 սեպտեմբերի – Sputnik. Օլիմպիական խաղերի, աշխարհի և Եվրոպայի բազմակի չեմպիոն Արթուր Ալեքսանյանը վնասվածքի պատճառով չմասնակցեց աշխարհի առաջնության եզրափակիչ գոտեմարտին:
Արթուր Ալեքսանյանը դուրս եկավ գորգ, շնորհավորեց մրցակցին ու հեռացավ։
Հայաստանի ըմբշամարտի ֆեդերացիայի գլխավոր քարտուղար Արայիկ Բաղդադյանը Sputnik Արմենիային հայտնեց, որ գոտեմարտից առաջ, նախավարժանքի ժամանակ Արթուրի ցավերը մեղմելու համար բժիշկները ներարկում են կատարել, սակայն դա էլ չի օգնել: Հայ ըմբիշը ֆիզիկապես չէր կարող մասնակցել գոտեմարտին: Ստացվում է, որ ռուս ըմբիշ Մուսա Եվլոևն առանց գոտեմարտի կարժանանա աշխարհի չեմպիոնի կոչմանը:
Նուր-Սուլթանում ընթացող ըմբշամարտի աշխարհի առաջնությունում հայ ըմբիշը սկսեց գոտեմարտել որակավորման փուլից ու հաջորդաբար հաղթանակի հասավ բելառուս Ալեքսանդր Հրաբովիկի, ֆինն Մաթի Կոսմանենի թուրք Չենք Իլդեմի, իրանցի Մոհամադհադի Սարավիի և կիսաեզրափակիչում էլ վրացի Գեորգի Մելիայի նկատմամբ:
Վերջին գոտեմարտի ընթացքում զգացվում էր, որ Ալեքսանյանն ինչ-որ խնդիր ունի և անընդհատ փորձում էր կարգավորել շնչառությունը: Ավելի ուշ հայտնի դարձավ, որ զգացնել է տվել հին վնասվածքը, բացի այդ, կողոսկրի կոտրվածք ունի:
Հայ ըմբիշն այսպիսով դառնում է աշխարհի առաջնության արծաթե մեդալակիր և միաժամանակ ապահովում օլիմպիական խաղերի ուղեգիրը։
Արթուր Ալեքսանյանը վնասվածք էր ստացել երեկ` Ղազախստանում ընթացող առաջնության 1/8–րդ եզրափակիչում, երբ գոտեմարտում էր թուրք ըմբիշ Չենք Իլդեմի հետ (գոտեմարտն ավարտեց 4։2 հաշվով)։ Դրանից հետո նա ևս երկու գոտեմարտ անցկացրեց Իրանի ու Վրաստանի ներկայացուցիչների հետ։
Հիշեցնենք` աշխարհի առաջնությունը Ղազախստանում մեկնարկել է սեպտեմբերի 14-ին։ Հայաստանն այս առաջնությանը ներկայացնում են Նորայր Հախոյանը (55 կգ), Գևորգ Ղարիբյանը (60 կգ), Սլավիկ Գալստյանը (63 կգ), Կարեն Ասլանյանը (67 կգ), Մալխաս Ամոյանը (72 կգ), Կարապետ Չալյանը (77 կգ), Մաքսիմ Մանուկյանը (82 կգ), Արթուր Շահինյանը (87 կգ) և Արթուր Ալեքսանյանը (97 կգ)։
