ԵՐԵՎԱՆ 16 սեպտեմբերի – Sputnik. Ըմբիշ Կարապետ Չալյանը Ղազախստանի մայրաքաղաք Նուր–Սուլթանում անցկացվող Ըմբշամարտի աշխարհի առաջնության կիսաեզրափակիչում պարտվեց շվեդ Ալեքս Բյուբերգ Կեսիդիսին։ Շվեդ ըմբիշին հաջողվեց հաղթանակ կորզել գոտեմարտի ավարտից 1 րոպե 25 վայրկյան առաջ:
Չալյանը շատ լավ գոտեմարտեր անցկացրեց նախնական փուլերում ու երեք անընդմեջ հաղթանակներից հետո շատ մոտ էր նաև հաղթանակին կիսաեզրափակիչում: Հայ ըմբիշը գոտեմարտի ընթացքում առջևում էր 2:1 հաշվով: Գոտեմարտի վերջնամասում Չալյանը գնաց գրոհի ու բաց թողեց շվեդ մրցակցի հակագրոհը, և Կասիդիսը վաստակեց չորս միավոր։ Հաշիվը դարձավ 5:2 հօգուտ մրցակցի:
Մնացած մեկուկես րոպեի ընթացքում Չալյանին չհաջողվեց բեկել գոտեմարտի ընթացքը, և մեր ըմբիշը վաղը կգոտեմարտի բրոնզե մեդալի համար: Միակ մխիթարությունը նաև այն է, որ Չալյանը այս քաշային կարգում Հայաստանի հավաքականի համար ապահովեց Տոկիո 2020-ի ուղեգիրը:
Մխիթարյանի ֆանտաստիկ նորամուտը «Ռոմա». մարզիչը գոհ է, երկրպագուները` նույնպես
Հիշեցնենք, որ առաջին գոտեմարտում Չալյանը դժվարին գոտեմարտում 4:2 հաշվով առավելության էր հասել ճապոնացի Շոհեի Յաբիկուի նկատմամբ, իսկ 1/8 եզրափակիչում արդեն բացահայտ առավելությամբ՝ 9:0 հաշվով, պարտության էր մատնել Վենեսուելայի ներկայացուցիչ Ռիվաս Էսպինոսային: Իսկ քառորդ եզրափակիչում էլ Կարապետը 5:4 հաշվով պարտության էր մատնել բելառուս Պավել Լյախին:
Հիշեցնենք` աշխարհի առաջնությունը Ղազախստանում մեկնարկել է սեպտեմբերի 14-ին։ Հայաստանն այս առաջնությանը ներկայացնում են Նորայր Հախոյանը (55 կգ), Գևորգ Ղարիբյանը (60 կգ), Սլավիկ Գալստյանը (63 կգ), Կարեն Ասլանյանը (67 կգ), Մալխաս Ամոյանը (72 կգ), Կարապետ Չալյանը (77 կգ), Մաքսիմ Մանուկյանը (82 կգ), Արթուր Շահինյանը (87 կգ) և Արթուր Ալեքսանյանը (97 կգ)։
