ԵՐԵՎԱՆ, 14 սեպտեմբերի – Sputnik. Դատախազությունում հարուցված մի քրեական գործի շրջանակներում առաջիկայում հարցաքննության կհրավիրվի Երևանի քաղաքապետի նախկին տեղակալ Վահե Նիկոյանը։ Այս մասին գրում է «Հրապարակ» օրաթերթը։
Թերթը հիշեցնում է, որ դեռևս օգոստոսին ՀՀ գլխավոր դատախազությունը հաղորդագրություն տարածեց՝ հայտնելով, որ «Փարքինգ սիթի սերվիս» ընկերության ավելի քան 700 մլն դրամի չափով փոխառության պարտավորությունն անհիմն մարվել է Երևանի համայնքային բյուջեի հաշվին։
Բաղրամյանում տեղի ունեցած չարաշահումների քրգործով 3 անձի մեղադրանք է առաջադրվել
Բացի այդ, պարզվել է, որ «Փարքինգ սիթի սերվիս» ընկերության պաշտոնատար անձինք, օգտագործելով իրենց պաշտոնեական դիրքը, «2017-2018թթ. և 2019 թվականի 1-ին եռամսյակի ընթացքում ընկերության աշխատակիցների դրույքաչափերի սխալ հաշվարկման արդյունքում վերջիններիս աշխատավարձերի հավելագրումներ կատարելու, տրանսպորտային միջոցներն առանց վերանորոգելու այդ նպատակով գումարներ դուրս գրելու և փաստացի չշահագործվող ավտոմեքենաներին հատկացված վառելիքի համար գումարներ փոխանցելու միջոցով, յուրացման եղանակով հափշտակել են ընդհանուր 20 մլն 714 հազար 515 ՀՀ դրամ:
Հարուցվել է քրեական գործ՝ ՀՀ քրօր․ 308-րդ հոդվածի 2-րդ մասի և 179-րդ հոդվածի 3-րդ մասի 1-ին կետի հատկանիշներով»:
«Ըստ տեղեկությունների՝ գործով անցնում է Վահե Նիկոյանը, որի կուրացիայի տակ են եղել այդ գործընթացները։ Սակայն Նիկոյանի հետ կապ հաստատել չի հաջողվել, «բաժանորդն անհասանելի» էր»»,– գրում է թերթը:
Հիշեցնենք, որ դեռևս 2016 թվականի նոյեմբերին Նիկոյանը հայտնել էր, որ Երևանի քաղաքապետարանը համաձայնության է եկել որպես նվիրատվություն ձեռք բերել «Փարկինգ Սիթի Սերվիս» ՓԲ ընկերության 100 տոկոս բաժնեմասը։
ՊՆ կապիտանն ու լեյտենանտը մեղադրվում են առանձնապես խոշոր չափի կաշառք տալու և ստանալու մեջ
Նիկոյանը փոխքաղաքապետ էր նշանակվել 2012–ի հունվարին։ 2018թ.–ին Հայկ Մարությանը առաջարկել էր նրան ստանձնել իր խորհրդականի պաշտոնը, սակայն Նիկոյանը հրաժարվել էր:
