ԵՐԵՎԱՆ, 12 սեպտեմբերի — Sputnik. ՀՀ վերաքննիչ քաղաքացիական դատարանը վարույթ չի ընդունել Ռոբերտ Քոչարյանն ընդդեմ Նիկոլ Փաշինյանի գործով Քոչարյանի ներկայացուցիչ Հայկ Ալումյանի կողմից ներկայացված բողոքը։ Այս մասին տեղեկանում ենք դատական տեղեկատվական համակարգից։
«Որոշումը կարող է բողոքարկվել վճռաբեկության կարգով` հրապարակման պահից տասնհինգօրյա ժամկետում»,–նշված է դատարանի որոշման մեջ։
Հայտնել էինք, որ Քոչարյանի ներկայացուցիչ Հայկ Ալումյանը վերաքննիչ էր դիմել` բողոքարկելով Երևանի ընդհանուր իրավասության դատարանի դատավոր Լիլիթ Սարգսյանի հունիսի 24–ի որոշումը։ Որոշման համաձայն` քանի որ հայցվորի կողմից հայցից հրաժարվելու հիմքով Քոչարյանն ընդդեմ Փաշինյանի գործի վարույթը կարճվել էր, դատարանը որոշել էր հայցվորից հօգուտ պատասխանողի որպես դատական ծախսերի փոխհատուցում բռնագանձել 200 000 դրամ։ Քոչարյանի ներկայացուցիչ Հայկ Ալումյանը, սակայն, չէր համաձայնվել դատական ծախսերի հետ և այդ հիմքով բողոք էր ներկայացրել Վերաքննիչ դատարան։
«Դատախազությունը չի ցանկանում տեսնել պարզ ճշմարտությունը». Արամ Վարդևանյան
Հիշեցնենք, որ Քոչարյանը հայցադիմում էր ներկայացրել Փաշինյանի դեմ ՝ Ֆրանսիա կատարած այցի ժամանակ արված հայտարարությունների համար։ Հայցվոր կողմը զրպարտություն էր համարել Փաշինյանի հետևյալ խոսքը. «...Կամ թեկուզ Ռոբերտ Քոչարյանին ազատ արձակելու մեկնաբանությունը: Ասում է՝ անձեռնմխելի է: Ի՞նչ է նշանակում անձեռնմխելի: Այսինքն՝ կարելի է մարդկանց սպանությունը կազմակերպել ու ասել՝ ես անձեռնմխելի՞ եմ: Այդ որտե՞ղ է այդպես գրած»։
Քոչարյանն ընդդեմ Փաշինյանի հունիսի 12–ին կայացած առաջին նիստի ժամանակ Ալումյանն ասել էր, որ Փաշինյանի դեմ ներկայացրած իրենց հայցը հետ կվերցնեն, եթե պատասխանողը հայտարարի, որ Փաշինյանն իր արտահայտության մեջ նկատի չի ունեցել Քոչարյանին։
Ի պատասխան դատարանում Փաշինյանի ներկայացուցիչ փաստաբան Գևորգ Գյոզալյանը նշել էր, որ այդ արտահայտությունը վերաբերել է սահմանադրաիրավական նորմի մեկնաբանությանը, այլ ոչ թե Քոչարյանին։
Հունիսի 13-ին հայտնի դարձավ, որ Քոչարյանը հետ է վերցրել իր հայցը։
Քոչարյանները ոչ մի գույք էլ չեն հանել վաճառքի. Լևոն Քոչարյանը հերքում է լուրը. տեսանյութ
