ԵՐԵՎԱՆ, 6 սեպտեմբերի — Sputnik. Այսօր կայացած «Իմ քայլը» խմբակցության նիստին, որին մասնակցել է նաև ՀՀ վարչապետ Նիկոլ Փաշինյանը, քննարկվել է Ամուլսարի հարցը, լսվել են կարծիքները, ներկայացվել է առկա իրավիճակը։ Այս մասին նիստից հետո լրագրողների հարցերին ի պատասխան ասաց ՀՀ ԱԺ փոխխոսնակ, « Իմ քայլը» խմբակցության պատգամավոր Ալեն Սիմոնյանը։
Նրա խոսքով` խմբակցությունում սրություն չկա հարցի հետ կապված, շատ ավելի համերաշխ մթնոլորտ է։
«Չի կարելի ասել, թե խմբակցությունում Ամուլսարի հարցով տարակարծություն կա։ Հիմնականում քննարկումներ են` բա էս որ սենց անենք, ինչ կլինի, իսկ էս պարագայում ինչ ենք անելու և այլն»,–ասաց Սիմոնյանը։
Լրագրողների հարցին, թե ինչ եզրահանգման եկավ խմբակցությունը քննարկման ընթացքում, Ալեն Սիմոնյանն ասաց, որ եզրահանգում դեռ չկա, որ եզրահանգում լինի, հանրությունն այդ մասին կիմանա։
Նա նաև հիշեցրեց, որ հարցն ավելի շատ կառավարության տիրույթում է, ոչ խմբակցության, իսկ խմբակցությունը քաղաքական հենարանն է։
Լրագրողները հիշեցրին, որ իշխանական խմբակցությունում կային պատգամավորներ, որոնք խիստ դեմ էին հանքի շահագործմանը և կային պատգամավորներ, որոնք, մեղմ ասած, չէին կիսում խմբակիցների կարծիքը, Սիմոնյանն նշեց, որ հանրության մեջ էլ կան մարդիկ, ովքեր դեմ են և կան մարդիկ, ովքեր կողմ են։
«Այս քննարկումները հենց դրա համար են, որ մենք լսենք բոլոր կողմերին և ճիշտ որոշում կայացնենք Հայաստանի համար։ Նիստին սկզբում խոսեց Նիկոլ Փաշինյանը, հետո պատգամավորները հարցեր ուղղեցին, վարչապետն ու փոխվարչապետը պատասխանեցին և այդպես»,–տեղեկացրեց Սիմոնյանը։
ԱԺ փոխխոսնակի խոսքով` քննարկումները կշարունակվեն այնքան ժամանակ մինչև վստահ լինեն, որ մեր բնությունն ու անվտանգությունը ռիսկի տակ չեն։ «Ինչպես նաև չենք կարող պետության վարկանիշը դնել ռիսկի տակ»,–հավելեց Ալեն Սիմոնյանը։
Նրա դիտարկմամբ` չի բացառվում, որ հանքն ընդհանրապես չշահագործվի և չի բացառվում,ո ր հանքը շարունակի շահագործվել։
Ամուլսարի հարցում կա՞ արդյոք հակասություն Ղազարյանի հին և նոր տեսակետների միջև. պարզաբանում
Հիշեցնենք` օգոստոսի 19–ին Facebook–ում ուղիղ եթերի ժամանակ ՀՀ վարչապետն ասել էր, որ Ամուլսարի հանքը կարող է գործարկվել, քանի որ «Էլարդ» ընկերության եզրակացության համաձայն` հավանական ռիսկերը կարող են ոչ էական լինել Սևանա լճի կամ Ջերմուկի ջրերի համար, եթե ընդունվեն կանխարգելիչ այն 16 միջոցները, որոնց մասին խոսվում է եզրակացության մեջ։
Դա բնապահպանների ու ակտիվիստների շարքերում բողոքի կտրուկ ալիք է բարձրացրել։ Իսկ ավելի ուշ` օգոստոսի 29–ին, վարչապետ Նիկոլ Փաշինյանի հետ տեսակոնֆերանսի ընթացքում նույն ընկերության ներկայացուցիչները նշել էին, որ կատարված փորձաքննություններն ու ՇՄԱԳ–ը բավարար չեն հանքն ապահով շահագործելու համար։
