ԵՐԵՎԱՆ, 6 սեպտեմբերի — Sputnik. Թուրքիայի հետ դիվանագիտական հարաբերությունների հաստատման առումով որևէ լավ լուր չկա։ Այս մասին լրագրողների հետ զրույցում ասաց արտաքին գործերի նախարար Զոհրաբ Մնացականյանը։
«Թուրքիայի հետ հարաբերությունների ուղղությամբ ոչ ողջունելի իրողություններ ունենք` Թուրքիայի կողմից Ցյուրիխի գործընթացի մերժում, շարունակական շրջափակում, Ցեղասպանության ժխտում»,– ասաց նա։
Նախարարի խոսքով` Հայաստանը պատրաստ է Թուրքիայի հետ առանց նախապայմանների դիվանագիտական հարաբերությունների հաստատմանը։ Սակայն դրա համար ենթադրվում է երկկողմանի ցանկություն ու համագործակցություն, ինչը, դեռևս, չկա։
Հիշեցնենք` ավելի վաղ Մնացականյանը հայտնել էր, որ Հայաստանն ու Թուրքիան կորցրել են երկկողմանի հարաբերությունները կարգավորելու հնարավորությունն ու դրա մեղավորն Անկարան է։
Այստեղից է սկսվում Հայաստանը… Երեք սահմանների խաչմերուկում ապրողների մասին
Խոսքը 2009թ–ի հոկտեմբերի իրադարձությունների` ցյուրիխյան արձանագրությունների մասին է։ Այն ժամանակ երկու երկրների արտգործնախարարները դիվանագիտական հարաբերությունների հաստատման ու առանց նախապայմանների երկկողմանի հարաբերությունների զարգացման մասին արձանագրություններ էին կնքել։ Սակայն, ավելի ուշ, Թուրքիան հրաժարվեց վավերացնել դրանք և առաջ քաշեց հայկական զինված ուժերն, իրենց խոսքով` «գրավված տարածքներից» հանելու նախապայմանը։
