ԵՐԵՎԱՆ, 6 սեպտեմբերի — Sputnik. Հաշվի առնելով, որ պետք է Հայաստանի հարաբերությունները խորացնել ոչ միայն ԵԱՏՄ անդամ պետությունների, այլ նաև այլ երկրների հետ` հոկտեմբերին Հայաստանում կայանալիք ԵԱՏՄ բարձրագույն տնտեսական խորհրդի նիստին Հայաստանը նաև հրավիրել է այլ երկրների ղեկավարներին։ Այս մասին լրագրողների հետ զրույցում ասաց արտաքին գործերի նախարար Զոհրաբ Մնացականյանը։
«Հոկտեմբերին Հայաստանում կայանալիք ԵԱՏՄ բարձրագույն տնտեսական խորհրդի նիստին կմասնակցեն ԵԱՏՄ անդամ երկրների ղեկավարները։ Բացի այդ, մենք հրավիրել ենք Մոլդովայի, Իրանի և Սինգապուրի ղեկավարներին։ Մենք նախապատրաստվում ենք և սպասում, որ նրանք կգան Երևան»,–ասաց նախարարը։
Նրա խոսքով` այժմ ակտիվորեն աշխատանքներ են տարվում ինչպես ԵԱՏՄ բարձրագույն տնտեսական խորհրդի նիստին մասնակցելու, այնպես էլ` հյուրերին ընդունելու համար։
Սիրիայի հարցում ՌԴ–ի հետ հստակ ձևավորված ռազմավարական համագործակցություն կա. ԱԳ նախարար
Ինչ վերաբերում է նիստի` Հայաստանում կայանալուն, ապա Մնացականյանը նշեց, որ այն եղել է Հայաստանի հրավերով և ԵԱՏՄ անդամ պետությունները ընդունել են հրավերը։
Թուրքիայի հետ դիվանագիտական հարաբերությունների հաստատման առումով լավ լուր չկա. ԱԳ նախարար
Հիշեցնենք, որ ԵԱՏՄ բարձրագույն տնտեսական խորհրդի նիստը կմեկնարկի հոկտեմբերի 1–ին։ Մամուլում լուրեր էին շրջանառվում, որ ՌԴ նախագահ Վլադիմիր Պուտինը հրաժարվել է մասնակցել նիստին ու գալ Հայաստան, սակայն երեկ ԱԳ փոխնախարար Շավարշ Քոչարյանը հերքեց այդ լուրերը։ Քոչարյանը վստահեցրեց` հոկտեմբերին Հայաստանում կայանալիք ԵԱՏՄ բարձրագույն տնտեսական խորհրդի նիստին կմասնակցեն ԵԱՏՄ անդամ երկրների բոլոր ղեկավարները, այդ թվում՝ ՌԴ նախագահ Վլադիմիր Պուտինը։
