ԵՐԵՎԱՆ, 3 սեպտեմբերի - Sputnik. Այն, որ Ռուսաստանի Դաշնության նախագահ Վլադիմիր Պուտինը շնորհՀայաստանիավորել է կալանքի տակ գտնվող երկրորդ նախագահ Ռոբերտ Քոչարյանին, ՌԴ-ում ՀՀ դեսպանն արտառոց չի համարում: Այս մասին դեսպանն այսօր ասաց ԱԺ-ում լրագրողների հետ զրույցում։
Հարցին` հնարավո՞ր է, որ պաշտոնական Կրեմլի շնորհավորանքը դիտվի որպես աջակցություն Քոչարյանին, դեսպանը պատասխանեց.
«Ոչ, չի կարող, քանի որ դա Հայաստանի ներքին հարցն է»:
Դեսպանի խոսքով` չի կարող խոսք լինել Հայաստանի ներքին գործերում Ռուսաստանի խառնվելու փորձերի մասին:
Հիշեցնենք` ավելի վաղ ՝ օգոստոսի 31-ին, Ռուսաստանի նախագահ Վլադիմիր Պուտինը շնորհավորել էր Ռոբերտ Քոչարյանին ՝ ծննդյան 65-ամյակի առթիվ: «Հարգելի Ռոբերտ Սեդրակի, ընդունեք անկեղծ շնորհավորանքներս 65-ամյակի կապակցությամբ։ Ձեր բազմամյա պետական գործունեությամբ Դուք արժանի հարգանք եք վաստակել ինչպես հայրենակիցների շրջանում, այնպես էլ արտերկրում, նշանակալի ավանդ եք ներդրել ժամանակակից Հայաստանի զարգացման և Անդրկովկասի՝ անվտանգության և կայունության ապահովման գործում»։
Ընդգծելով երկրորդ նախագահի մեծ դերը հայ-ռուսական դաշնակցային հարաբերությունների ամրապնդման մեջ՝ Պուտինը Քոչարյանին ամուր առողջություն և տոկունություն էր մաղթել։
Ռոբերտ Քոչարյանի գործով նոր դատավորի նախագահությամբ առաջին նիստը տեղի կունենա հաջորդ շաբաթ
Հիշեցնենք` 2018 թվականի հուլիսի 26-ին Մարտի 1-ի գործով Հատուկ քննչական ծառայությունում քննվող քրեական գործով Հայաստանի երկրորդ նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը: Այս պահին Ռոբերտ Քոչարյանը գտնվում է կալանավայրում։
