«Իհարկե ծրագիրն էլ հաստատուն վիճակում չի եղել, ժամանակի ընթացքում պարբերաբար ենթարկվել է փոփոխությունների: Դրանով պայմանավորված որոշակի փոփոխություններ են եղել մեր մոտեցումներում: Սա ամբողջությամբ դինամիկ պրոցես է, բայց սկզբունքային հարցերում, մասնավորապես իմ մոտեցումները չեն փոխվել»,- նշում է Էդգար Ղազարյանը:
Նա ընդգծում է, որ խնդրին ծանոթացել է դեռևս այն ժամանակ, երբ Հայաստանի տնտեսագիտական համալսարանի Եղեգնաձորի մասնաճյուղի տնօրենն էր: «Հայրս եղել է Ջերմուկի քաղաքային խորհրդի գործադիր կոմիտեի նախագահ, մենք ապրել ենք Ջերմուկում, իմ պատանեկան տարիներն անցել են այնտեղ և հիմա էլ հաշվառված եմ որպես այդ քաղաքի բնակիչ: Այդ խնդիրը մշտապես ինձ հուզել է»,–ասում է նախկին մարզպետը։
Նրա հավաստմամբ՝ մինչև մարզպետ նշանակվելը, որպես հանրային ակտիվիստ զբաղվել է այդ թեմայով՝ ի տարբերություն շատերի: Հանդիպումներ է ունեցել «Լիդիանի» ոչ միայն հայաստանյան ղեկավարության, այլև «Լիդիան Ինթերնեյշնլի» տարբեր ղեկավարների հետ, որոնց ընթացքում հայտնել է իր անհանգստությունը բոլոր այն ռիսկերի առթիվ, որոնք գոյություն են ունեցել:
«Մարզպետի պաշտոնում շարունակել եմ մնալ իմ տեսակետին, և դրա լավագույն ապացույցը վերջերս «Լիդիանի» կողմից արված հայտարարությունն էր, որում իրենք են հավաստում, որ հենց 2013-14 թվականներին իրենց ներկայացվել են պահանջներ, օրենսդրության մեջ կատարվել են փոփոխություններ, ինչի հետևանքով իրենք ստիպված են եղել ՇՄԱԳ-ն ու իրենց նախագծերը վերանայել»,- տեղեկացնում է Էդգար Ղազարյանը:
Վայոց Ձորի նախկին մարզպետի խոսքով՝ իր մոտեցումները պատահական ու տարերային չեն եղել: Իր կողմից ցուցաբերվել է անհանգստություն ոչ թե արդեն հանրային մակարդակում, այլ պաշտոնական լիազորությունների շրջանակում՝ ելնելով իշխանական հնարավորություններից, ինչն ապացուցում է, որ մոտեցումները չեն փոխվել:
Հիշեցնենք` օգոստոսի 19–ին Facebook–ում ուղիղ եթերի ժամանակ ՀՀ վարչապետն ասել էր, որ Ամուլսարի հանքը կարող է գործարկվել, քանի որ «Էլարդ» ընկերության եզրակացության համաձայն` հավանական ռիսկերը կարող են ոչ էական լինել Սևանա լճի կամ Ջերմուկի ջրերի համար, եթե ընդունվեն կանխարգելիչ այն 16 միջոցները, որոնց մասին խոսվում է եզրակացության մեջ։
Դա բնապահպանների ու ակտիվիստների շարքերում բողոքի կտրուկ ալիք է բարձրացրել։Օգոստոսի 14-ին, վկայակոչելով նույն միջազգային փորձաքննության արդյունքները, Քննչական կոմիտեն հայտարարել էր, հանքի շահագործման դեպքում ՀՀ օդի, ջրի, հողի աղտոտման չափերն այնքան փոքր կլինեն, որ «չափելի չեն լինի»։ Կենսաբազմազանության վրա բացասական ազդեցության հիմքեր ևս չէին հայտնաբերվել։ Այս փորձաքննության հիման վրա քննչական խումբը եկել է այն եզրակացության, որ շրջակա միջավայրի աղտոտման մասին տեղեկությունները դիտավորյալ թաքցնելու, հետևաբար և նախկին պաշտոնյաների նկատմամբ քրեական հետապնդման հիմքեր չկան։
Դրանից հետո հանքի շահագործման դեմ բողոքի ակցիաններն ավելի մեծ թափ հավաքեցին։ Բնապահպան ակտիվիստները հանդիպում ունեցան ՀՀ վարչապետ Նիկոլ Փաշինյանի հետ։ Իսկ արդեն օգոստոսի 29–ին ՀՀ կառավարության որոշ անդամներ` վարչապետ Նիկոլ Փաշինյանի գլխավորությամբ, ««Էլարդի» հետ Skype-կոնֆերանս ունեցան, որից հետո հայտարարվեց, որ կատարված փորձաքննություններն ու ՇՄԱԳ–ը բավարար չեն հանքն ապահով շահագործելու համար։
Ամուլսարի հանքշահագործման ծրագրի փորձաքննությունն իրականացրած «Էլարդի» փորձագետները հայտարարել են, որ ուսումնասիրությունն արվել է 2016թ–ին կազմված ՇՄԱԳ–ի ու «Լիդիան»–ի ներկայացրած փորձաքննությունների հիման վրա։
