ԵՐԵՎԱՆ, 30 օգոստոսի – Sputnik. Վրաստանի նախագահ Սալոմե Զուրաբիշվիլու անվան շուրջ հերթական իրարանցումն է առաջացել, երբ նա Սուրբ Աստվածածնի վերափոխման տոնի կապակցությամբ (նշվում է օգոստոսի 28–ին) ներում է շնորհել 34 դատապարտյալի։ Այս մասին հայտնում է Sputnik Գրուզիան։
Ներում ստացածների թվում է նաև Ռամազ Դևաձեն, որը 2014 թվականին ազատազրկման էր դատապարտվել ոստիկան Թարաշ Մուքբանյանին սպանելու համար: Ընդդիմությունն ու շարքային քաղաքացիները վրդովվել են, թեման քննարկվում է սոցցանցերում։
22-ամյա ոստիկան Թարաշ Մուքբանյանի սպանությունը տեղի է ունեցել 2014 թվականի դեկտեմբերի 27-ին Բաթումի գիշերային ակումբներից մեկում: Քննչական մարմնի տվյալների համաձայն` նրա և ոչ սթափ վիճակում գտնվող Դևաձեի միջև վեճ է սկսվել, որի ընթացքում Դևաձեն ոստիկանից խլել է ծառայողական զենքը և կրակել նրա գլխին: Մուքբանյանը տեղում մահացել է:
2015 թվականի սեպտեմբերին Դևաձեն դատապարտվել է 12 տարվա բանտարկության։
Վրաստանի նախագահը սկանդալի մեջ է հայտնվել. նրան իմպիչմենտով են սպառնացել
Ֆրանսիայում գտնվող Զուրաբիշվիլին հրաժարվել է իր որոշումը մեկնաբանել մինչ Թբիլիսի վերադառնալը։
«Ինչու՞ եմ ներում շնորհել, ճիշտն ասած` չեմ ասի ձեզ։ Դա նախագահի դիսկրեցիոն իրավունքն է, բոլոր իրավաբանները, նաև ոչ իրավաբանները գիտեն դրա մասին... Եթե ավելի հանգամանալից հայտարարություն է պետք անել, կարծում եմ` դա պետք է Թբիլիսիում անել», – ասել է Զուրաբիշվիլին Imedi հեռուստանընկերությանը։
Միաժամանակ նա ափսոսանքով է նշել, որ իր եվրոպական այցելության ժամանակ, երբ երկրի համար կարևոր հարցեր են քննարկվում, փորձ է արվում ուշադրությունը շեղել այլ հարցի վրա։
Նախագահին դատապարտել է նաև Վրաստանի խորհրդարանի իրավաբանական հարցերի կոմիտեի նախագահ Անրի Օհանաշվիլին:
«Ինձ համար անընդունելի է այս դեպքը՝ ներում շնորհել ոստիկանին սպանելու համար դատապարտվածին, որի պատժաժամկետի կեսը նույնիսկ չի լրացել»,- ասել է Օհանաշվիլին Առաջին ալիքի հետ զրույցում։
Վրաստանի նախագահ Սալոմե Զուրաբիշվիլին սկանդալային պատմության մեջ էր հայտնվել նաև մայիսին Վրաստանի տարածքում ԱՄՆ–ի ռազմաբազայի վերաբերյալ արտահայտած դիրքորոշման պատճառով։
Վրաստանի անձնագիր ստանալն ավելի հեշտ կդառնա. ինչի մասին է խոսել Զուրաբիշվիլին Ջավախքում
