ԵՐԵՎԱՆ, 29 օգոստոսի — Sputnik. «Ջերմուկ Գրուպ» փակ բաժնետիրական ընկերությունը կազատվի մաքսատուրքից։ Այս մասին այսօր կառավարության նիստում հայտարարեց ՀՀ տնտեսական զարգացման և ներդրումների նախարար Տիգրան Խաչատրյանը` ներկայացնելով համապատասխան որոշման նախագիծը։
Ինչպես հայտնեց նախարարը, ընկերությանը տրվելու է 20 մլրդ 800 մլն դրամի մաքսատուրքի արտոնություն` պոլիմերային շշերի նոր արտադրություն հիմնելու նպատակով հումքի և սարքավորումների ներկրման համար։ Այս արտադրությունը ապահովելու է 15 լրացուցիչ աշխատատեղ`180 000 դրամ միջին աշխատավարձով։
Բնապահպանության նախարարը հիշեցրեց, որ պլաստիկե շշերի ներմուծման ու իրացման համար ՀՀ օրենսդրությամբ նախատեսված են բնապահպանական վճարներ ու հետաքրքրվեց` արդյո՞ք արտադրության դեպքում այդ հարկատեսակը գանձվելու է։
Վարչապետ Փաշինյանն էլ հավելեց. «Փաստորեն, ջերմուկի արտադրությունն էլ է շրջակա միջավայրին վնաս։ Մտածեք, ի՞նչ անենք, փակե՞նք, թե՞ չփակենք»։
Ի պատասխան՝ տնտեսական զարգացման և ներդրումների նախարարը հայտնեց, որ միայն ջերմուկի արտադրությունը, չէ, որ վնասում է Հայաստանի բնությանը. նման արտադրություններ մեր երկրում շատ կան։
«Գազավորված ընմելիքներ շշալցնող ընկերությունները գրեթե բոլորը նույն արտադրական գործընթացն ունեն։ Այսինքն` ներկրում են շշեր, արտադրում ու շշալցնում։ Այս պահին չեմ կարող ասել, թե որ պահին է առաջանում բնապահպանական վճարը կատարելու պարտավորությունը։ Բայց եթե օրենքով սահմանված է, որ պետք է վճարեն՝ բնականաբար, այս ընկերությունները կատարում են վճարումները»,– ասաց Խաչատրյանը։
ՊԵԿ նախագահ Դավիթ Անանյանն էլ հայտնեց, որ բնապահպանական վճարները պլաստիկե շշերի հումք ներկրող ընկերություններից գանձվում են հենց սահմանին` ՀՀ ներմուծման ժամանակ։
ՊԵԿ նախագահը նաև վստահեցրեց, որ «Ջերմուկ Գրուպն», անկախ ստացած արտոնությունից, բնապահպանական հարկ վճարելու է։ Նրա խոսքով՝ կառավարության տրամադրած արտոնությունները բնապահպանական վճարների վրա չեն տարածվում։
Հարկային արտոնություններ տրվեցին նաև 2019թ.–ին հիմնված, պլաստմասսե խցաններ արտադրող «ԳՈԼԴ ՔԱՓ» սահմանափակ պատասխանատվությամբ ընկերությանը` 4 մլրդ 622 մլն դրամի սարքավորումների ու հումքի արտադրության համար։ Ընկերության ներկայացրած ծրագրով նախատեսվում է բացել 23 աշխատատեղ` 160 000 դրամ աշխատավարձով։
Կառավարությունը մաքսային արտոնություն է տրամադրում զենք արտադրելու համար
Երրորդ ընկերությունը, որն արժանացավ կառավարության որտոնությանը՝ 1991թ.–ից Երևանում գործող ԶԵՆՆԻ սահմանափակ պատասխանատվությամբ ընկերությունն է։ Այն զբաղվում է կոշկի և կաշվե պարագաների արտադրությամբ։ Ընկերությանը տրվեց 440 մլն դրամի մաքսային արտոնություն` հումքի և նոր սարքավորումների ներկրման համար, որով նախատեսվում է հիմնել լրացուցիչ 10 աշխատատեղ` 120 000 դրամ աշխատավարձով։
