ԵՐԵՎԱՆ, 28 օգոստոսի — Sputnik. Կիևի վերաքննիչ դատարանը որոշել է կալանքից ազատ արձակել ՌԻԱ Նովոստի Ուկրաինա կայքի ղեկավար Կիրիլ Վիշինսկուն։
Վիշինսկին հայտարարել է, որ պատրաստ է ներկայանալ ուկրաինական դատարանի առաջին իսկ պահանջով, եթե փոխեն նրա խափանման միջոցը։
«Ես պարտավորություն եմ հայտնում դատարանի առաջին որոշմամբ ներկայանալ բոլոր դատական նիստերին և մասնակցել դրանց», – ասել է Վիշինսկին նիստի ժամանակ։
ՌԻԱ Նովոստիի և RT–ի գլխավոր խմբագիր Մարգարիտա Սիմոնյանն իսկույն արձագանքել է այդ որոշմանը։
«Կիրիլին ազատ են արձակել։ Ուռաաաաաա՜», – գրել է նա Telegram–ալիքում։
«Վերլուծաբանները և փորձագետները շատ կարևոր դիտարկումներ կանեն այն մասին, թե ինչ է նշանակում Կիևի դատարանի այսօրվա որոշումը ռուս–ուկրաինական հարաբերությունների, Ուկրաինայի ապագայի համար, ինչպես է այն բնութագրում նոր նախագահին և բնութագրո՞ւմ է արդյոք ու ճիշտ կանեն։ Շատ ուրախ ենք Կիրիլի համար։ Խոնարհվում եմ բոլոր նրանց առջև, ովքեր օգնել են։ Մոսկալկովայի, Վենեդիկտովի, իրավաբանների և բոլոր նրանց, ովքեր չէին ուզի տեսնել իրենց անունները», – գրել է նա։
ՌԻԱ Նովոստի Ուկրաինա կայքի խմբագիր Կիրիլ Վիշինսկին կալանավորվել էր 2018թ.–ի մայիսի 15–ին Կիևում։ Լրագրողին կասկածում են Դոնբասում ինքնիշխան հանրապետություններին աջակցելու և պետական դավաճանության մեջ։
Վլադիմիր Պուտինը իրավիճակն աննախադեպ էր անվանել։ Մոսկվան բողոքի նոտա էր հղել Կիև` պահանջելով դադարեցնել մամուլի ներկայացուցիչների նկատմամբ բռնությունները։
Վիշինսկու գործում ապացույցների բազա չկա. Լուկաշևիչը` Խերսոնի դատարանի որոշման մասին
ԵԱՀԿ գլխավոր քարտուղար Թոմաս Գրեմինգերը, մեկնաբանելով Վիշինսկու շուրջ ստեղծված իրավիճակը, ընդգծել էր, որ կազմակերպության բոլոր երկրները պարտավորվել են պայմաններ ստեղծել, որոնց շրջանակում լրագրողները կկարողանան կատարել իրենց պարտականությունները մասնակից այլ պետություններում, այդ պատճառով նրանք պետք է պահպանեն միջազգային ստանդարտներն ու չմիջամտեն ԶԼՄ–ների աշխատանքին։
