ԵՐԵՎԱՆ, 27 օգոստոսի — Sputnik. Այն, որ ՀՀ Սահմանադրությունն արգելում է ԶՈւ կիրառել զանգվածային անկարգությունները կանխելու համար միֆ է։ Այսօր լրագրողների հետ հանդիպմանը նման հայտարարությամբ հանդես եկավ ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանը։
«Սա միֆ է, և այսօր Ռոբերտ Քոչարյանի դեմ հարուցված քրեական գործի մեծ մասը հիմնված է այդ միֆի վրա։ Իրականում մեր Սահմանադրությունը թույլ է տալիս կիրառել ԶՈւ հնարավոր բացասական հետևանքները կանխելու համար»,- ասաց Ալումյանը։
Որպես ապացույց փաստաբանը վկայակոչեց ՀՀ Սահմանադրության 8.2 հոդվածը, որտեղ ասվում է. «ՀՀ ԶՈւ ապահովում են ՀՀ պաշտպանությունը, անվտանգությունը, տարածքային ամբողջությունը, նրա սահմանների անձեռնմխելիությունը»։
Ալումյանը վկայակոչեց նաև ՀՀ ԶՈւ ներքին կանոնակարգը, որում նշվում է, որ զիծառայությունները կարող են մասնակցել այնպիսի գործողությունների, որոնք դատարանի կողմից ճանաչվել են հասարակության ու պետության շահերից բխող։ Նույն իրավական ակտի մեկ այլ հոդվածում նշվում է, որ ԶՈւ կարող են կիրառվել նաև զինված անձի կամ անձանց դեմ, եթե այլ կերպ նրանց հնարավոր չէ վնասազերծել։
Ալումյանը նաև կոնկրետ օրինակներ բերեց Լևոն Տեր-Պետրոսյանի կողմից 1996թ-ի ցույցերի ընթացքում ԶՈւ-ի կիրառման վերաբերյալ։ Մասնավորապես, երբ հոկտեմբերի 2-ին ՀՀ բանակը մտավ մայրաքաղաք՝ պաշտպանելու նախագահական նստավայրը։
Ալումյանը շեշտեց, որ ի տարբերություն 2008թ-ի, 1996թ-ին ԶՈւ կիրառվել է առանց արտակարգ դրություն հայտարարելու։
«Եթե մեր քննչական մարմինները, Դատախազությունը սևեռվել են այն գաղափարի, ընդ որում՝ կեղծ գաղափարի վրա, որ զորքը չի կարող օգտագործվել ներքին նպատակներով, ապա ինչու այս ամենին գնահատական չի տրվում», - հռետորական հարց հնչեցրեց Ալումյանը։
Քոչարյանի փաստաբանը քաղաքացիների դեմ զինուժի կիրառման օրինակներ բերեց նաև միջազգային պրակտիկայից ՝ օրինակներ բերելով Չինաստանի, Նեպալի, ՀԱՀ, Հնդկաստանի, Բրազիլիայի, Մեծ Բրիտանիայի և ԱՄՆ-ի պրակտիկայից։
