ԵՐԵՎԱՆ, 20 օգոստոսի — Sputnik. Գեղհովիտում սիբիրյան խոցով հիվանդ կենդանին` կովը, մորթվել ու մոտ 25 ընտանիքի է բաժանվել։ Այս մասին Sputnik Արմենիային հայտնեց Սննդամթերքի անվտանգության տեսչական մարմնի ղեկավար Գեորգի Ավետիսյանը։
Արդեն հայտնել էինք, որ Գեղարքունիքի մարզի Մարտունու տարածաշրջանի Գեղհովիտ համայնքի 5 բնակիչ «Նորք» ինֆեկցիոն հիվանդանոց է տեղափոխվել` սիրբիրյան խոցի մաշկային ձևով։
«Երեկ ենք իմացել դեպքի մասին, չնայած կենդանուն մորթել էին օգոստոսի 12–ին։ Մեր տեսուչները գնացել ու տեղում են իմացել` ինչ կենդանի է մորթվել ու ինչ պայմաններում։ Պարզվել է` տնային պայմաններում է կենդանին մորթվել ու բաժանվել 25 տուն։ Ավելին, մոտավոր 20-30 կգ միս արդեն հասցրել են օգտագործել»,–ասաց Ավետիսյանը։
Նրա խոսքով` մորթած ու հիվանդ կենդանու կաշին ու գլուխը գտել ու այրել են։ Նա նշեց նաև, որ կովը հիվանդացել է, քանի որ տերը հրաժարվել է պատվաստումից` ասելով, որ կենդանին հղի է։ Ծննդաբերությունից հետո նույնպես կենդանին չի պատվաստել։
Ինչ վերաբերում է գյուղում եղած այլ կենդանիներին, ապա մասնագետները բոլոր կենդանիներին ջերմաչափում են, ինչպես նաև կովի հորթն է ջերմաչափվում։
Այսուհետ Գյումրիում կիրականացվի ցիվիլ առևտուր. մսավաճառները ՍԱՏՄ ղեկավարից նվեր ստացան
Ավետիսյանի խոսքով` երբ բոլոր կենդանիների մորթն իրականացվի սպանդանոցներում, այդ ժամանակ հնարավոր կլինի խուսափել նման դեպքերից։ «Երբ սիբիրյան խոցի նշաններն ի հայտ են գալիս, կենդանին շատ արագ սատկում է։ Ամենայն հավանականությամբ, կենդանին հոգեվարքի մեջ է եղել, որ գյուղացիներն արագ մորթել են բաժանել կամ վաճառել։ Պետք է իրազեկել մարդկանց, որ չստուգված տեղերից միս չպետք է գնել»,–ասաց նա։
Հիշեցնենք, որ Մարտունու ԲԿ–ի ինֆեկցիոն բաժանմունք էին դիմել Գեղհովիտ համայնքի 2 բնակիչ՝ ձեռքի մատների և դաստակի շրջանում խոցոտված վերքերով։ Հիվանդները նշել էին, որ մի քանի օր առաջ մասնակցել են համագյուղացու կովի մսեղիքի կտրատման և մշակման աշխատանքներին։
