ԵՐԵՎԱՆ, 14 օգոստոսի-Sputnik. Գյումրիում ավարտվել է Ջուլիետա Ղուկասյանի գործի նախաքննությունը: Առաջիկայում դատախազությունը մեղադրական եզրակացությունը կուղարկի Շիրակի մարզի ընդհանուր իրավասության դատարան: Հիշեցնենք, որ 2018 թվականի դեկտեմբերի 2-ին Գյումրու «Սլաբոդկա» թաղամասում դաժան ծեծի հետևանքով հիվանդանոցում մահացել էր 57-ամյա Ջուլիետա Ղուկասյանը: Կասկածյալը 102-րդ ռազմաբազայի պայմանագրային զինծառայող Անդրեյ Ռազգիլդեևն է։
Տուժողի իրավահաջորդի շահերը ներկայացնող Հելսինկյան քաղաքացիական ասամբլեայի Վանաձորի գրասենյակի փաստաբանների միջնորդությունները մերժվել են։ Մինչ նոր միջնորդություններ ներկայացնելը տուժողի իրավահաջորդի ներկայացուցիչները Ռազգիլդեևին ՀՀ քրեակատարողական հիմնարկ տեղափոխելը մերժելու Շիրակի մարզի և ՀՀ վերաքննիչ քրեական դատարանի որոշումները բողոքարկել են Վճռաբեկ դատարան։
Վերջիններս միջնորդել էին նաև քննչական ու դատավարական գործողություններ կատարել գործում տեղ գտած որոշ հանգամանքների շուրջ։ Նրանք նշում են, որ քրեական գործի նյութերում ապացույց չկա այն մասին, որ ՀՀ քննչական կոմիտեի և ռուսական ռազմաբազայի ներկայացուցիչները համատեղ են հայտնաբերել և ձերբակալել Ա․ Ռազգիլդեևին։ Քանի որ որևէ հիմք չկա պնդելու, որ ռազմաբազա չտեղափոխելը կարող էր հակասել ՌԴ օրենսդրությանը, ինչպես նախկինում, կրկին միջնորդել էին միջոցներ ձեռնարկել Ռազգիլդեևին ՀՀ համապատասխան քրեակատարողական հիմնարկ տեղափոխելու համար։
ՌԴ ռազմաբազայի ներկայությունը չի կարող ազդել ՀՀ ինքնիշխանության վրա
Ռազգիլդեևին ՀՀ քրեակատարողական հիմնարկ տեղափոխելու հարցին անդրադառնալն էլ քննիչը համարել է հիմնազուրկ և նշել, որ այդ հարցը քննարկվել է տարբեր ատյաններում, տրվել են սպառիչ պարզաբանումներ։
Նշենք, որ ձեռբակալումը տեղի է ունեցել ռազմաբազայի տարածքում, պահման գործողությունը կատարվում է ՌԴ իրավապահների հետ համատեղ, իսկ նախաքննություն իրականացրել է հայկական կողմը:
Տուժողի իրավահաջորդներին այս պահին դեռ հստակ չէ, թե որտեղ են անցկացվելու դատական նիստերը:
