ԵՐԵՎԱՆ, 9 մարտի – Sputnik. Հայաստանում Ռուսաստանի դեսպան Սերգեյ Կոպիրկինը հուսով է, որ քննությունը կպարզի Գյումրիում ռուսական ռազմակայանի զինծառայողի հետ տեղի ունեցած միջադեպի բոլոր հանգամանքները, և մեղավորները կպատժվեն։
«Դա քննության հարց է, հուսանք, որ այս ողբերգական միջադեպի վերաբերյալ համակողմանի և արդար հետաքննություն կիրականացվի», – Sputnik Արմենիայի թղթակցի հետ զրույցում ասաց դեսպան Սերգեյ Կոպիրկինը։
Ավելի վաղ հայտնի էր դարձել, որ 22 տարեկան զինծառայող Ռաջան Կաժիմիրովին (ծնունդով` Հյուսիսային Կովկասից) պտուտակահանով հարվածել էին Գյումրու սրճարաններից մեկում։ Կրծքավանդակի աջ կեսի կտրած-ծակած նրան տեղափոխել էին Գյումրու բժշկական կենտրոն։ Կենտրոնից Sputnik Արմենիային հայտնեցին, որ տուժածին վիրահատել են, վիճակը գնահատվել է բավարար, և նա այսօր տեղափոխվել է ռազմաբազայի տարածքում գտնվող հոսպիտալ:
Այդուհանդերձ, դեսպանի կարծիքով` կասկած չկա, որ հայ բնակչության հիմնական զանգվածը բարյացակամ վերաբերմունք ունի ռուս զինծառայողների նկատմամբ և կարևորում է ռազմակայանի ներկայությունը երկրում։
«Իհարկե, ոմանք ուզում են, որ այլ կերպ լինի։ Այդպիսի մարդիկ կան նաև Հայաստանից դուրս։ Սակայն մեր ժողովուրդները իմաստուն են։ Մենք սովոր ենք մեր խելքով ապրել», – ասաց ռուս դիվանագետը։
Գյումրիում մեծ թվով զինվորականներ են ծառայում, նրանց հետ են ապրում նաև իրենց ընտանիքները։ Հայաստանի այդ և մյուս մարզերում և՛ ռուսներ, և՛ ռուսախոս քաղաքացիներ կան։ Նրանց համար բավական հարմարավետ պայմաններ են ստեղծվել, ընդգծեց դեսպանը։
«Մեր ժողովուրդները շատ մոտ են, փոխըմբռնման և անվստահության խոչընդոտներ երբեք չեն եղել, և ես համոզված եմ` երբեք չեն լինի։ Իսկ եթե խնդիրներ են առաջանում, ապա դրանք լուծվում են», – ասաց դեսպանը։
Կոպիրկինը նաև նշեց` ռուսաստանցիների համար կարևոր է, որ Հայաստանում ամեն բան լավ լինի, երկիրը զարգանա։
«Համոզված եմ` Հայաստանի համար էլ է կարևոր, որ Ռուսաստանը բարգավաճի», – ավելացրեց դեսպանը։
Հիշեցնենք, որ մարտի 3-ին, ժամը 01:30–ի սահմանում Գյումրու սրճարաններից մեկում վիճաբանություն է տեղի ունեցել, ինչի հետևանքով ինչ–որ պահի պտուտակահանով հարվածել են զինվորականներից մեկին` Ռաջան Կաժիմիրովին։ Դրանից հետո վիճաբանության մասնակիցները ցրվել են։ Մեր տեղեկություններով` սրճարանից անհետացել է տեսախցիկի ձայնագրությունը։
