ԵՐԵՎԱՆ, 10 օգոստոսի — Sputnik. Մարալիկում այսօր բամբակամանվածքային գործարան բացվեց, որը 297 000 դրամ միջին աշխատավարձով աշխատատեղեր կապահովի 150 մարդու համար։ Այս մասին լրագրողների հետ զրույցում ասաց գործարանի համասեփականատեր Գևորգ Գասպարյանը։
«Գործարանը բացվել է նախկին բամբակամանվածքային գործարանի տարածքում, սակայն նախկին գործարանից ոչինչ չէր մնացել։ ԽՍՀՄ–ի տարիներին 1700 հոգի է աշխատել այս գործարանում, որից 60–ը հաշվապահ է եղել։ Ինչների՞ս է պետք 60 հաշվապահը: Եթե այդ աշխատատեղերը պահպանեինք, մեր թելը ոսկու գին կունենար»,–ասաց նա։
Գասպարյանի խոսքով` բամբակամանվածքային գործարանի հումքը ներկրվելու է Թուրքմենիայից, Ուզբեկստանից, քանի որ բամբակի արտադրություն Հայաստանում, ցավոք, չկա։ Ինչ վերաբերում է սպառողներին, ապա գործարանի հիմնական թիրախը «Տավուշի տեքստիլն» է լինելու, որը մինչ այս իր հումքը բերում էր դրսից։
Գասպարյանը հայտնեց նաև, որ իրենց ապրանքը նաև արտահանվելու է, այսինքն` ոչ թե թելն է արտահանվելու, այլ իրենց թելերով պատրաստված հայկական մանվածքը։
Մարալիկի բամբակամանվածքային ֆաբրիկայում «Արթիկի ՓՀԿ» ՍՊԸ-ի կողմից մինչ օրս իրականացվել է 4 մլն ԱՄՆ դոլարին համարժեք ներդրում։ Նախատեսվում է առաջիկա 1 տարում ավարտին հասցնել նաև ՀՀ կառավարության կողմից արտոնություն ստացած 13 մլն ԱՄՆ դոլար ներդրումային ծրագիրը։ Առաջին փուլով նախատեսվում է ունենալ մինչև 120 աշխատակից, ներկայում ընկերությունն ունի 41 վերապատրաստված աշխատակից, առկա են թափուր աշխատատեղեր։ Առաջին փուլով ամսական թողարկվելու է 380 տոննա թել, որը կիրառվում է տեքստիլ արտադրության մեջ։ Սպառման հիմնական շուկաներն են Հայաստանը և Ռուսաստանը։
Մարալիկցիները Նիկոլ Փաշինյանին դիմավորեցին «Արտակ, հեռացի՛ր» կոչով
Նշենք նաև, որ գործարանի բացմանը ներկա է նաև ՀՀ վարչապետ Նիկոլ Փաշինյանը:
Նա Facebook-ի իր էջով ուղիղ եթերում ցույց է տվել նոր գործարանի սարքավորումները:
