ԵՐԵՎԱՆ, 10 օգոստոսի — Sputnik. ՀՀ զինված ուժերի զորավարժարաններից մեկում անցկացվել է «Խաղաղության մարտիկ» մրցույթի ռազմամասնագիտական «Աթլետ» մրցաձևի երկրորդ փուլը: Մրցաձևի թիմային և անհատական հաշվարկով հաղթել է Ռուսաստանի թիմը։ Այս մասին հայտնում է ՀՀ պաշտպանության նախարարության մամուլի ծառայությունը։
««Աթլետ» մրցաձևի երկրորդ փուլում տղամարդիկ ուժերն են չափել ռազմամարզական հնգամարտում և մասնագիտական պատրաստության համալիր մրցումներում: Երկօրյա մրցումների արդյունքների համադրմամբ հաղթանակ է տարել Ռուսաստանի թիմը, երկրորդ տեղում Ղազախստանի թիմն է, երրորդում՝ ՀՀ ԶՈՒ զինծառայողների թիմը»,–նշված է հաղորդագրության մեջ:
Նշենք, որ մրցման ժամանակ մասնակիցները բարդ տեղանքում կատարել են թիրախների խոցում ԱԿ-74 ինքնաձիգով, նռնակի, դանակի նետում և այլ վարժություններ:
Ընդհանուր հաշվարկով «Խաղաղության մարտիկ» միջազգային մրցույթում առաջատարը ՀՀ զինված ուժերի ներկայացուցիչներն են: Երկրորդ և երրորդ տեղերը համապատասխանաբար զբաղեցնում են Ռուսաստանի և Ղազախստանի թիմերը:
ՌԴ թիմը հաղթել է «Խաղաղության մարտիկ» մրցույթի երկրորդ փուլում
Առաջիկայում մասնակիցները ուժերն են չափելու գրական-գեղարվեստական, պարային-երաժշտական «Տեր և տիկին» և կրակային պատրաստության «Դիպուկահար» մրցաձևերում:
Ինչպես են հայ տանկիստները հաղթահարում դժվարություններն ու ծածանում եռագույնը. տեսանյութ
Հիշեցնենք` «Խաղաղության մարտիկ» միջազգային մրցումները, որոնք մեկնարկել են օգոստոսի 3-ին և կտևեն մինչև ամսի 15-ը, անցկացվում են «Միջազգային բանակային խաղեր-2019» մրցաշարի շրջանակում։
