ՀՀ երկրորդ նախագահ Ռոբերտ Քոչարյանի պաշտպաններից Հովհաննես Խուդոյանը Sputnik Արմենիայի հետ զրույցում խոսել է Քոչարյանի գործով ՄԻԵԴ որոշման մասին։
Պաշտպանի խոսքով` ՄԻԵԴ–ի որոշումը` առաջնահերթ քննարկել Քոչարյանի գործով դիմումը` սպասելի էր: Կարելի էր ենթադրել, որ հրատապություն պետք է լինի:
«Կարծում եմ՝ ՄԻԵԴ-ը կարճ ժամկետում կտա իրավական գնահատկաններ, որոնք հիմք կլինեն գործն ավարտելու համար»,–ասել է Խուդոյանը։
Հովհաննես Խուդոյանը նշել է, որ առանձին հարցերով ևս պաշտպանական խումբը շարունակելու է դիմել ՄԻԵԴ, անհրաժեշտության դեպքում՝ նաև ՄԱԿ–ի հանձնաժողով։
Հիշեցնենք, որ Մարդու իրավունքների եվրոպական դատարանը հաստատել է, որ ստացել է ՍԴ դիմումը։ ՄԻԵԴ-ը Սահմանադրական դատարանին տեղեկացրել է, որ երկրորդ նախագահ Ռոբերտ Քոչարյանի գործով ներկայացված դիմումը կքննարկվի առաջնահերթության կարգով։
Պաշտպանների գանգատներից մեկը ներկայացվել է Եվրոպական կոնվենցիայի 6-րդ հոդվածի 2-րդ և 3-րդ կետերով` անմեղության կանխավարկածի և պաշտպանության իրավունքի խախտման հիմքերով, իսկ մյուսը՝ Ռոբերտ Քոչարյանի նկատմամբ որպես խափանման միջոց կալանավորման որոշումն ընտրելու հիմքով:
