Երևան-Սևան ճանապարհի կամրջի տակ տեղադրված պայթուցիկը, որով փորձել էին պայթեցնել ԱԺ նախկին պատգամավոր, գործարար Մելիք Մանուկյանի («Շշի Մելո») ավտոմեքենան, հեռակառավարվել է դեպքի վայրի հարևանությամբ գտնվող, չգործող ռեստորանային համալիրից։ Այս մասին հայտնում է ՀՀ ոստիկանության մամուլի ծառայությունը։
»Շինության սենյակներից մեկում կատարված զննությամբ հայտնաբերվել են պայթյունը հեռակառավարելու համար նախատեսված տեխնիկական միջոցներ»,– նշված է հաղորդագրության մեջ։
Ոստիկանությունը հայտնում է նաև, որ օպերատիվ տեղեկություններով պարզվել է նաև հանցագործությունը կատարելու մեջ կասկածվող անձանց ինքնությունը, ինչի արդյունքում դեպքից մի քանի ժամ անց մայրաքաղաքում հայտնաբերել ու ձերբակալվել են 3 տղամարդ։
Ավելի վաղ հայտնել էինք, որ ձերբակալվածները Շիրակի մարզից են, որոնցից երկուսը` 56-ամյա Արթուր Մխիթարյանը և 53-ամյա Պետրոս Էլբակյանը, բնակվել են Երևան քաղաքի Նորք-Մարաշ վարչական շրջանում, իսկ երրորդը Շիրակի մարզի բնակիչ 45-ամյա Ջեմսիկ Մարտիրոսյանն է։
Հիշեցնենք` օգոստոսի 2-ին, ժամը 12:17-ին «911» ծառայությունն ահազանգ էր ստացել, որ Երևան-Սևան ավտոճանապարհին՝ «Արծվի» արձանի մոտակայքում, տեղի է ունեցել պայթյուն, որի հետևանքով ավերվել էր ճանապարհին գտնվող կամրջի ասֆալտե ծածկույթը։
Պայթյունի հետևանքով վնասվել էին ճանապարհով ընթացող Range Rover մակնիշի 555 LL 05 համարանիշի և Nissan մակնիշի 35 MD 686 համարանիշի ավտոմեքենաները, որոնցից առաջինը պատկանում է հենց նախկին պատգամավորին, երկրորդում պայթյունի պահին եղել են նրա թիկնապահները։
Պայթյունի պահին ավտոմեքենաները կամրջին են եղել։
Ավելի ուշ մի քաղաքացի, առանց տեղում գործողություններ իրականացնող իրավապահների թույլտվության, պայթյունի հետևանքով վնասված մեքենաներից մեկով հեռացել էր՝ չենթարկվելով ոստիկանության ծառայողների օրինական պահանջներին։ Ձեռնարկված միջոցառումների արդյունքում կարճ ժամանակում մեքենան հայտնաբերվել և վերադարձվել է դեպքի վայր։ Պայթյունի վայրից հեռացած քաղաքացուն հայտնաբերել ու ձերբակալել էին։
Պայթյունի փաստով Քննչական կոմիտեի Կոտայքի մարզային քննչական վարչությունում քրեական գործ է հարուցվել Քրեական օրենսգրքի 104 հոդվածի 2–րդ մասի 6–րդ կետի (շատերի կյանքի համար վտանգավոր եղանակով սպանության փորձ) և 235 հոդվածի 1–ին մասի (ապօրինի կերպով զենք–զինամթերք ձեռք բերելը, պահելը) հատկանիշներով։
Դեպքի վայրից ավտոմեքենայով փախուստի դիմած քաղաքացու նկատմամբ հարուցվել է քրեական գործ ՀՀ քրեական օրենսգրքի 316-րդ հոդվածի հատկանիշներով (Իշխանության ներկայացուցչի նկատմամբ բռնություն գործադրելը)։
