ԵՐԵՎԱՆ, 2 օգոստոսի — Sputnik. Պահպանակների արտադրությամբ զբաղվող բելառուսական ընկերությունը որոշել է իր արտադրանքն ակտիվ խթանել արտերկրում, այդ թվում` նաև Հայաստանում։ Ընկերությունն արդեն երեք պատվեր ստացել է հայ գնորդներից։ Այս մասին Sputnik Բելառուսին հայտնել է «Ֆարմին» ընկերության բրենդ–մենեջեր Անդրեյ Պլյուշենյան։
Ավելին, նրա խոսքով, արդեն հետադարձ կապ է հաստատվել հայաստանցի գնորդների հետ։ Հայ տղամարդկանցից բողոքներ են ստացվել այն պահպանակների վերաբերյալ, որոնք կոչված են երկարացնելու սեռական գործողությունը։ Նրանք կցանկանային, որպեսզի արդյունքն ավելի երկար տևեր։
Սակայն մենեջերը նշել է, որ նման պահպանակներում ցավազրկող են օգտագործում, որը կարող է ալերգիա առաջացնել, և մեկ միլիգրամից շատ այդ նյութն ավելացնելու դեպքում անհրաժեշտ է լրացուցիչ կլինիկական ուսումնասիրություններ անցկացնել։ «Դա երեք տարի կտևի և հսկայական գումարներ կպահանջի։ Հայաստանն այդ ուսումնասիրությունների ծախսը չի կարողանա հանել», – ասել է Անդրեյ Պլյուշենյան։
Բելառուսցի մենեջերը ևս մեկ հատկանշական մանրամասն է ներկայացրել. պարզվում է` հայ տղամարդիկ բողոքել են` ասելով, որ արտադրանքն իրենց համար շատ փոքր է։
Պայքար ՁԻԱՀ–ի դեմ. ո՞ր մարզում է իրավիճակն առավել ողբալի
«Եվրոպական չափանիշների համաձայն` պահպանակի տրամագիծը պետք է լինի 52-54 միլիմետր։ Մեր պահպանակները 52 միլիմետր են։ Առանձին արտադրողներ շարք ունեն XXL առավելագույն չափով։ Դրանց տրամագիծը 56 միլիմետր է։ Սակայն մենք այդպիսի պահպանակներ չենք արտադրում», – նշել է նա։
Ընկերությունը մտադիր է նաև ռուսական շուկա դուրս գալ։ Մենեջերը կարծում է, որ հաջողությանը միտված առաջին քայլերն ընկերությունն արդեն արել է` իրականացնելով 2019 թվականի համար նախատեսած բոլոր ծրագրերը։
