Վարչապետ Նիկոլ Փաշինյանի նորանշանակ խորհրդական, Գեղարքունիքի մարզի Կալավան գյուղի բնակիչ, գործարար Ռոբերտ Ղուկասյանը համոզված է, որ իրեն խորհրդականի պաշտոնում նշանակելը պայմանավորված է համայնքում իր ծավալած գործունեությամբ, որը նկատել ու գնահատել է գործադիրի ղեկավարը։
«Այն ամենը, ինչի մասին խոսում էր վարչապետ , այսինքն` համայնքների կայուն զարգացման ծրագիրը, Կալավանում մենք այդ ամենն իրականացնում ենք։ Մեր անցած հենց այդ ճանապարհն էլ չի վրիպել վարչապետի աչքից»,–կարծում է նորանշանակ խորհրդականը։
Ղուկասյանը վստահեցնում է, որ անձնական ծանոթություն չի եղել. նախքան Փաշինյանի` Կալավան այցելելը, երբևէ առիթ չի ունեցել շփվել ոչ նրա, ոչ էլ վարչապետի ընտանիքի հետ։ Ռոբերտ Ղուկասյանը մանրամասնում է նաև իր հաջողելու գաղտնիքը։
«Ամենամեծ գրավականն այն է, երբ համայնքը սկսում է աշխատել, երբ գյուղում կա մրցակցություն դեպի լավ կյանքը»,–ասում է գործարար խորհրդականը։
Նրա խոսքով՝ շատ կարևոր է, որ բնակիչը զգա, որ ինքն է գյուղի տերը։
Ղուկասյանը վստահ է, որ իրենց համայնքի փորձը կարող է տեղայնացվել նաև հանրապետության մյուս մարզերում։
«Որքան մեծ է համայնքը, այնքան այդ հնարավորություններն ավելի մեծ են, քանի որ մեծ համայնքում մարդկային ռեսուրսներն ավելի շատ են նման գործունեություն ծավալելու համար»,–նկատում է Ղուկասյանը։
Ղուկասյանը դեռ չի շտապում խորհուրդներ տալ, փոխարենը հայտնում է իր կարծիքը` կապված գյուղական համայնքներում առկա խնդիրների հետ։
«Համայնքապետարանները պետք է 180 աստիճանով կերպարանափոխվեն»,–կարծում է վարչապետի նորանշանակ խորհրդական Ռոբերտ Ղուկասյանը։
Ըստ նրա՝ որոշ համայնքներում դեռևս գործում են հին Հայաստանի, նույնիսկ` խորհրդային տարիների կարծրատիպերը։
