ԵՐԵՎԱՆ, 25 հուլիսի — Sputnik. A&R Tour զբոսաշրջային ընկերությունը բանակցություններ է վարում Հուրգադայից Երևան չարթերային չվերթ իրականացնելու համար, որպեսզի Եգիպտոսում մնացած զբոսաշրջիկներին վերադարձնի հայրենիք։ Այդ մասին Sputnik Արմենիայի թղթակցի հետ զրույցում ասաց A&R Tour զբոսաշրջային ընկերության տնօրեն Անի Ալեքսանյանի ներկայացուցիչ, փաստաբան Արսեն Մկրտչյանը։
Ինչպես արդեն տեղեկացրել էինք, Հայաստանից Եգիպտոս մեկնած մոտ 100 քաղաքացիներ չեն կարողանում վերադառնալ հայրենիք Հուրգադա–Երևան OTF 370 ավիաչվերթը հետաձգելու պատճառով։ A&R tour ընկերությունը տոմսեր և տուրեր է վաճառել Եգիպտոս (Շարմ էլ Շեյխ և Հուրգադա), իսկ հիմա չեղարկել է բոլոր չվերթերը։
Այսօր առավոտից Հուրգադայում մնացած հայ զբոսաշրջիկների` A&R tour ընկերության հաճախորդների ազգականները հավաքվել են ընկերության գրասենյակի մոտ։
Նրանց միացել են այլ զբոսաշրջային գործակալությունների ներկայացուցիչներ, որոնք A&R tour–ի միջոցով փաթեթներ են ամրագրել։ Նրանք պարզաբանումներ են պահանջում չվերթն ուշացնելու համար, որի հետևանքով Հայաստանի ավելի քան 120 քաղաքացի չեն կարողանում տուն վերադառնալ։
«Տվյալ պահին բանակցություններ են ընթանում Հայաստանի քաղաքացիներին հայրենիք վերադարձնելու համար։ Բանակցություններ են ընթանում ինչպես մասնավոր ընկերությունների, այնպես էլ պետական պատկան մարմինների հետ», - ասաց Մկրտչյանը։
Նրա խոսքով՝ իր 30 տարվա աշխատանքային փորձի ընթացքում պետության կողմից Հայաստանի քաղաքացիներին նման աջակցություն դեռ չի եղել։
Մկրտչյանը տեղեկացրեց, որ Ալեքսանյանը դիմել է համապատասխան մարմիններին։ Նա կարծում է, որ իր աշխատանքին արհեստականորեն խոչընդոտում են։ Արդյունքում զբոսաշրջային ընկերությունը չի կարողանում իր պարտավորությունները կատարել։
Հուրգադայում մնացած զբոսաշրջիկների ազգականները բողոքում են գործակալության գրասենյակի մոտ
Ըստ Մկրտչյանի, զբոսաշրջային ընկերությունը հնարավորությունների ներածին չափով տեղավորել է Եգիպտոսում մնացած հայերին հյուրանոցներում և ապահովել սնունդով։ Այն անձանց, որոնց չի հաջողվել օգնել, գործակալությունը պատրաստ է փոխհատուցում տրամադրել։
«Ընկերությունն իր բյուջեից արել է առավելագույնն, ինչը հնարավոր էր այդ պայմաններում իրականացնել», - ասաց Մկրտչյանը։
Նա նշեց, որ շատ տհաճ իրավիճակ է ստեղծվել, և ոչ ոք չէր ցանկանա նման քաշքշուկում հայտնվել։
