ԵՐԵՎԱՆ, 21 հուլիսի — Sputnik. Ռուսաստանում Թուրքմենստանի դեսպանատան աղբյուրը չի հաստատում Թուրքմենստանի նախագահ Գուրբանգուլի Բերդիմուհամեդովը մահվան մասին այսօր լրատվամիջոցներում տարածված լուրը։ Այս մասին հայտնում է «ՏԱՍՍ» գործակալությունը։
Ավելի վաղ որոշ լրատվամիջոցներ գրել էին, որ այսօր երիկամի անբավարարության պատճառով Բերդիմուհամեդովը մահացել է։
Մասնավորապես, քաղաքագետ, Եվրասիական խնդիրների մոնիթորինգի կենտրոնի նախագահ Ասլան Ռուբաևը, հղում անելով մայրաքաղաքի աղբյուրներին, նախագահի մահվան մասին լուրը հայտնել էր «Խոսում է Մոսկվան» ռադիոկայանին։
«Ինձ այդ մասին տեղեկացրել են Աշխաբադում ապրող մարդիկ։ Նրանք գործարարներ են։ Երբ ես փորձեցի ճշտել տեղեկության հավաստիությունը, նրանք ասացին, որ այդ մասին իրենց ասել են հատուկ ծառայություններում աշխատողները»,–ասել է նա։
Նեզիգար տելեգրամ–ալիքի տվյալներով` Բերդիմուհամեդովի մահվան մասին լուրը նախօրեին հայտնել է թուրքմենական ընդդիմությունը։
Հաշվի առնելով, որ Թուրքմենստանը ինֆորմացիոն առումով փակ երկիր է, այս տեղեկության հավաստիությունն ու աղբյուրն անհայտ են։
Ի դեպ, Թուրքմենստանի նախագահականի կայքում նշված է, որ այսօր նախագահը շնորհավորել է առողջապահական ոլորտի աշխատողներին` մասնագիտական տոնի կապակցությամբ։
Նշենք, որ Թուրքմենստանի ղեկավարը հուլիսի 15–ից գտնվում է արձակուրդում։ Հաղորդվում էր, որ նա ժամանակն անցկացնում է ընտանիքի հետ և գիրք է գրում։
