ԵՐԵՎԱՆ, 19 հուլիսի - Sputnik. Մոսկվայի միջտարածաշրջանային տրանսպորտային դատախազությունը ստուգում կիրականացնի` կապված «Նորդվինդ» ավիաընկերության ինքնաթիռում տեղի ունեցած պատահարի հետ, որը տեղի է ունեցել Շերեմետևո միջազգային օդանավակայանում։ Այդ մասին հաղորդում է գերատեսչության կայքը։
Նշվում է, որ ժամը 00։55–ին «Նորդվինդ» ավիաընկերության ինքնաթիռը, որը Շերեմետևոյի միջազգային օդանավակայանից իրականացնում էր Մոսկվա–Երևան չվերթը, թափավազքի փուլում ընդհատել է թռիչքը։
«Անձնակազմը հաղորդել է խցիկում առաջացած ծխի մասին, և դրա հետ կապված՝ թռիչքը դադարեցնելու մասին որոշում է ընդունվել։ Ինքնաթիռում եղել են 173 ուղևոր և անձնակազմի 6 անդամ, տարհանումը կատարվել է փչովի սադուղքով։ Օդանավը զննելու ժամանակ բաց կրակ չի նկատվել»,- նշվում է դատախազության հայտարարությունում։
Ավելի վաղ դատախազությունը Շերեմետևո օդանավակայանում պլանային ստուգում է կատարել, և գնահատական կտրվի նաև այդ պատահարին։
Հաղորդագրությունում ասվում է, որ օդանավակայան է մեկնել Մոսկվայի միջտարածաշրջանային տրանսպորտային դատախազի տեղակալ Օլեգ Օպենիշևը։
Հիշեցնենք, որ հուլիսի 18-ի լույս 19-ի գիշերը Մոսկվայի «Շերեմետևո» օդանավակայանում Nordwind Airlines ավիաընկերության՝ Մոսկվա-Երևան չվերթն իրականացնող Boeing 737 ինքնաթիռն ընդհատել է թռիչքը, որովհետև օդաչուների խցիկում միացել է ծխի ազդանշանը։ Ուղևորներին սկսել են տարհանել։ Հրմշտոց է սկսվել, որի ժամանակ 8 մարդ է տուժել։
