ԵՐԵՎԱՆ, 17 հուլիսի - Sputnik. Սեպտեմբերի 22-ին Հայաստանում կայանալիք «Բայքթոն Երևան-2019»-ին կմասնակցի մոտ 250 քաղաքացի, այդ թվում սահմանափակ կարողություններով անձինք` անվասայլակներով: Այս մասին Sputnik Արմենիա մուլտիմեդիոն մամուլի կենտրոնում կայացած ասուլիսի ժամանակ ասաց «Բայքթոն Արմենիա» ՀԿ հիմնադիր և նախագահ Հայրապետ Էքմեքջյանը:
«Սա մրցույթ չէ, հեծանվավազք է, որին կարող է մասնակցել ցանկացած անձ, որը հեծանիվ ունի: Ժամը 9–ին Հյուսիսային պողոտայից կմեկնարկի հեծանվավազքը, կանցնի Աբովյան և Բեյրութի փողոցներով, այնուհետև Հաղթանակ կամրջով կշարժվենք դեպի Իսակովի պողոտա, ապա մինչև Արգավանդի խաչմերուկ և նույն ուղղությամբ հետ կվերադառնանք»,–ասաց նա։
Նրա խոսքով` իրենց նպատակն է ունենալ կանաչ Երևան ու խթանել հեծանիվն իբրև տրանսպորտի միջոց կիրառելուն։
Արոնյանի կնոջն ու նրա ուղեկիցներին թուրքերը հետապնդել են հայկական շապիկի պատճառով
Ըստ Էքմեքջյանի` իրենք հեծանվավազքի մասին նաև տեղեկացրել են ոստիկանությանը, իսկ ողջ երթուղու ժամանակ մասնակիցներին կուղեկցի պրոֆեսիոնալ հեծանվորդների խումբը։ Իսկ եթե ճանապարհի կլինեն մարդիկ, որ «կհանձնվեն» ավելի շուտ, քան նախատեսված է երթուղով՝ այդ մասին նույնպես մտածել են միջոցառման կազմակերպիչները։
«Մինչև Արգավանդի խճուղի հասնելը` նրանք, ովքեր չեն ուզի շարունակել ճանապարհը, նախ կարող են Ամերիկյան դասպանատան խաչմերուկից հետ վերադառնալ, սակայն եթե կլինեն մարդիկ, որ ճանապարհի կեսից կհասկանան, որ չեն կարողանում շարունակել, մենք մեքենայով կտեղափոխենք նրանց»,–ասաց Էքմեքջյանը։
Նա նշեց նաև, որ հավատում է` մի օր Երևանի փողոցներն ամբողջությամբ հարմարեցված կլինեն հեծանվի համար, քանի որ աշխարհի երկրների փորձը ցույց է տալիս, որ անհնար ոչինչ չկա։ Էքմեքջյանն, ի դեպ, Բեյրութում է ծնվել, բայց վեց տարի է՝ Հայաստան է տեղափոխվել: Նա կարծում է, որ եթե դրսում ապրող հայերն ուզում են օգնել Հայաստանին, պետք է վերադառնան հայրենիք:
«Բայքթոն Արմենիա» ՀԿ հոգաբարձուների խորհրդի անդամ Գարեն Հարբոյանն էլ նախ հորդորեց բոլորին հեծանվավազքին ներկայանալ պաշտպանիչ սաղավարտներով։ Ի դեպ, միջոցառմանը սաղավարտով մասնակցելու դեպքում կլինեն նաև անակնկալներ։
«Սաղավարտների վրա կլինեն չիպեր, որոնք նախ կֆիքսեն, թե որքան ճանապարհ է անցել հեծանվորդը, որից ելնելով էլ` վերջում նվերներ կտրամադրենք մասնակիցներին։ Կոչ եմ անում բոլորին՝ սաղավարտով մասնակցել միջոցառմանը՝ հաճելին անհրաժեշտի հետ համատեղելով»,–ասաց նա։
Ի դեպ, «Բայքթոն Արմենիա» ՀԿ-ն միայն Երևանով չի սահմանափակվելու. նպատակ ունեն նման հեծանվավազքեր կազմակերպել նաև Գյումրիում, Վանաձորում, ինչպես նաև Արցախում։
Ինչո՞ւ է արուճցի տղան երազում հարստանալ, կամ «խոպանչիների» գյուղի տխուր պատմությունը
