ԵՐԵՎԱՆ, 11 հուլիսի — Sputnik. Արարատի մարզում վթարի հետևանքով 7 զոհերից 6-ը մահացել են այրվածքների պատճառով, 1-ը` այլ։ Վիրավորներից 3-ի վիճակը մինչև հիմա մնում է ծանր։ Այս մասին այսօր կառավարության նիտում հայտնեց ՀՀ առողջապահության նախարար Արսեն Թորոսյանը։ Նման ողբերգական դեպքերի կանխարգելման համար նախարարը նաև կոնկրետ առաջարկ ներկայացրեց։
«Պարտադիր դարձնենք գազաբալոնային համակարգերի ավտոմատ անջատման տեղադրումը բոլոր մեքենաների վրա` հաշվի առնելով, որ մեքենաների մեծ մասը հիմա գազով են երթևեկում, և հենց այդ պատճառով են եղել զոհերի մեծ մասը։ Այսինքն` արագ այրվել են ու նույնիսկ չեն հասցրել նրանց տարհանել կամ նույնիսկ օգնություն ցուցաբերել»,– ասաց Թորոսյանը։
Անդրադառնալով Վրաստանի տարածքում տեղի ունեցած վթարին` նախարարը հիշեցրեց, որ մեքենան եղել է գերբեռնված։ Եղել է 3 զոհ, որոնցից 2-ը` երեխաներ, և 2 ծանր վիրավոր, որոնք տեղափոխվել են Հայաստան։
«Բժիշկները պայքարում են նրանց կյանքի համար։ Դեռևս վաղ է գնահատել` կստացվի փրկել, թե չէ։ Առաջարկում եմ Վրաստան երթևեկող բոլոր մեքենաներին սահմանային անցակետեր մտնելուց առաջ անխտիր ստուգել գերբեռնվածության համար»,– ասաց Թորոսյանը։
Արարատի ողբերգական վթարից տուժած 20 տարեկան աղջիկը մահացել է
Վիճակագրական կոմիտեի նախագահն էլ հիշեցրեց զարգացած տրանսպորտային համակարգ ունենալու անհրաժեշտության մասին, որի դեպքում անգամ շահավետ չի լինի այլևս երթևեկել սեփական ավտոմեքենայով։ Նիկոլ Փաշինյանը համաձայնեց, որ գաղափարն ակնհայտորեն ճիշտ է, բայց քննարկում տրանսպորտի վերաբերյալ չծավալվեց։
