ԵՐԵՎԱՆ, 9 հուլիսի — Sputnik. ՀՀ խորհրդարանի այսօր մեկնարկող արտահերթ նստաշրջանը սկսվեց Արարատի մարզում ու Վրաստանի տարածքում տեղի ունեցած ողբերգական ավտովթարների զոհերի հիշատակը մեկ րոպե լռությամբ հարգելով:
«Մինչև մեր աշխատանքները սկսելը առաջարկում են մեկ րոպե լռությամբ հարգենք Արարատ-Մեղրի ավտոճանապարհի Զոդի կամրջի և Թբիլիսի-Սենակ-Լեսելիձե ավտոճանապարհին տեղի ունեցած ողբերգական ավտովթարների հետևանքով զոհվածների հիշատակը»,- նիստի մեկնարկին ասաց նիստը վարող ԱԺ փոխնախագահ Վահե Էնֆիաջյանը:
Հիշեցնենք` 2019 թվականի հուլիսի 6-ին, ժամը 15:00-ի սահմաններում, Երևան-Մեղրի ավտոճանապարհի 54-րդ կիլոմետրի հատվածում՝ Արարատի մարզի Զոդի կամրջի վրա միմյանց են բախվել «ԳԱԶԵԼ», «Տոյոտա Հիլուքս» և «ՎԱԶ 21063» մակնիշի ավտոմեքենաները, որի արդյունքում հրդեհ է բռնկվել «ԳԱԶԵԼ» մակնիշի ավտոմեքենայում, այնուհետև հրդեհը տարածվել է «Տոյոտա Հիլուքս» մակնիշի և «ՎԱԶ 21063» մակնիշի ավտոմեքենաներում, ինչի հետևանքով ստացած այրվածքներից «ԳԱԶԵԼ» մակնիշի ավտոմեքենայի վարորդը և վերջինիս 6 ուղևորները տեղում մահացել են, «ԳԱԶԵԼ»-ում գտնվող մյուս ուղևորները, ինչպես նաև «Տոյոտա Հիլուքս» մակնիշի ավտոմեքենայի վարորդը և ուղևորները՝ ընդհանուր թվով 11 մարդ, մարմնական տարբեր վնասվածքներով տեղափոխվել բժշկական կենտրոններ:
Արարատում կողաշրջվել է ՀՀ ՊՆ համարանիշներով «Ուրալ» մակնիշի ավտոմեքենան
Իսկ հուլիսի 7–ին ողբերգական ավտովթար էր տեղի ունեցել Թբիլիսի-Սենակ-Լեսելիձե ավտոճանապարհի 100-րդ կմ-ում. ժամը 06։00-ի սահմանում «Mercedes» մակնիշի ավտոմեքենան (վարորդ՝ Ա.Մ., 43 տարեկան) բախվել էր արգելապատնեշին և բռնկվել։ Վթարի հետևանքով 3 մարդ մահացել էր, որից երկուսը` երեխա։
Վթարից տուժած 5 քաղաքացիներից 3-ը հաջորդ օրը «Շտապօգնության» ծառայության մեքենայով Վրաստանից տեղափոխվել են Հայաստան:
