ԵՐԵՎԱՆ, 8 հուլիսի — Sputnik. Հրդեհ է բռնկվել ՀՀ պետեկամուտների կոմիտեի շենքում։ Ինչպես տեղեկացնում են ՀՀ ԱԻՆ մամուլի ծառայությունից, հուլիսի 8-ին, ժամը 21:55-ին «911» ծառայությանն ահազանգ է ստացվել, որ Երևան քաղաքի Կողբացու 1 հասցեում հրդեհ է բռնկվել. անհրաժեշտ է փրկարարների օգնությունը:
Հրդեհի բարդության «1 Բիս» կանչով դեպքի վայր է մեկնել չորս մարտական հաշվարկ և Ճգնաժամային կառավարման ազգային կենտրոնի արտակարգ իրավիճակների արձագանքման խումբը:
Պարզվել է, որ հրդեհը բռնկվել է Խորենացու փողոցի շենքերից մեկի 6-րդ հարկի սենյակներից մեկում:
Հրդեհը մեկուսացվել է ժամը 22:20-ին:
Sputnik Արմենիայի հետ զրույցում ՊԵԿ մամուլի խոսնակ Լուսինե Մկրտչյանն ասաց, որ հրդեհը տեղային բնույթ է կրել, փրկարարներին հաջողվել է այն մեկուսացնել և չեզոքացնել վտանգը։ Տուժածներ չկան։
