Հովհաննես Խուդոյանը նշել է, որ գրավի չափը պաշտպանները թողել են դատարանի հայեցողությանը, որքան որ կորոշի դատարանը։
Փաստաբանի խոսքով՝ ակնկալվում էր, որ նիստը շատ արագ և սեղմ ժամկետում պետք է նշանակվեր, բայց դատարանը պատճառաբանելով, որ գործի նյութերը վերաքննիչ դատարանում են, մինչև այսօր նիստ չի հրավիրել։
Գրավի հարց քննարկելիս` գումարի չափ չեն նշել, թողել են դատարանի հայեցողությանը։
«Գրավը կներկայացնի Ռոբերտ Քոչարյանի ազգականներից կամ ընկերներից մեկը, քանի որ Քոչարյանը իր միջոցները չի կարող օգտագործել՝ կա նաև գույքի կալանքի մասին որոշում»,-ասել է Խուդոյանը։
Դատարանը միջնորդության վերաբերյալ դեռևս դիրքորոշում չի ներկայացրել:
Հիշեցնենք, որ ՀՀ երկրորդ նախագահ Ռոբերտ Քոչարյանի պաշտպանները գրավոր միջնորդություն են ներկայացրել Երևանի ընդհանուր իրավասության դատարանի դատավոր Դավիթ Գրիգորյանին` իրենց պաշտպանյալին գրավի դիմաց ազատ արձակելու վերաբերյալ միջնորդության մասին:
Հիշեցնենք, որ հունիսի 25–ին ՀՀ Վերաքննիչ քրեական դատարանի դատավոր Արմեն Դանիելյանը որոշում կայացրեց կալանավորել Արցախի նախկին և ներկա նախագահների անձնական երաշխավորությամբ ազատ արձակված Ռոբերտ Քոչարյանին, իսկ նրա և մյուսների վերաբերյալ գործի վարույթը կասեցնելու առաջին ատյանի դատարանի դատավոր Դավիթ Գրիգորյանի որոշումը բեկանել և գործն ուղարկել նոր քննության։
