ԵՐԵՎԱՆ, 7 հուլիսի — Sputnik. ՌԴ Սվերդլովսկի շրջանում տեղի ունեցած ՃՏՊ-ի պատճառով պայթել է բենզատար մեքենան։ Պայթյունի հետևանքով զոհվել է 4 մարդ, տուժել են` 11-ը։ Պարզվել է, որ մեքենայի վարորդը եղել է ոչ սթափ վիճակում, հաղորդում են ռուսական ԶԼՄ-ները։
Սարսափելի վթարը տեղի է ունեցել շաբաթ լույս կիրակի գիշերը Կարպինսկ-Կիտլիմ ճանապարհի 44-րդ կիլոմետր հատվածում, տեղի ժամանակով ժամը 00:15-ին։ Վառելիքով բեռնված բենզատարը մտել է ճամփեզրի առուն, որից հետո տեղի է ունեցել պայթյուն։ Ռուսաստանի ՆԳՆ գլխավոր վարչության տվյալներով՝ 1968 թ-ին ծնված վարորդը թույլ է տվել, որպեսզի ցիստեռնի վրա նստեն յոթ զբոսաշրջիկներ, ապա կորցրել է կառավարումը։
«Ոստիկանության աշխատակիցների անցկացրած փորձաքննությունը ցույց է տվել, որ վարորդի արյան մեջ 0,706 պրոմիլե ալկոհոլ կա, ինչը շատ մեծ չափաբաժին է», - ՌԻԱ Նովոստիին հաղորդել է ՆԳՆ ԳՎ մամուլի ծառայության ղեկավար Վալերի Գորելիխը։ Նրա խոսքով՝ տուժածների թվում կա 2005թ․ ծնված դեռահաս, որին ուղղաթիռով շտապ տեղափոխել են Եկատերինբուրգի հիվանդանոց։ Արդեն պարզվել է երկու մահացածների ինքնությունը։
