ԵՐԵՎԱՆ, 6 հուլիսի – Sputnik. Եվրոպական խորհրդի նախագահ Դոնալդ Տուսկը հուլիսի 9-ին կմեկնի Ադրբեջան։ Այցի շրջանակում նա կհանդիպի նաև նախագահ Իլհամ Ալիևի հետ։ Այս մասին հայտնում է ՌԻԱ Նովոստին՝ հղում անելով սեփական աղբյուրին։
«Բաքու կատարած այցի ընթացքում Տուսկը կհանդիպի Ադրբեջանի նախագահ Իլհամ Ալիևի հետ, նաև Բաքվի միջազգային ծովային նավահանգիստ կայցելի», - հայտնել է գործակալության զրուցակիցը։
Օրակարգում են գործակցության հարցերը, տարածաշրջանային համագործակցության ընդլայնումը։ Կողմերը կքննարկեն նաև «Արևելյան գործընկերության» ծրագիրը, որին Ադրբեջանը մասնակցում է 2008 թվականից։
Ծրագիրը նախատեսում է քաղաքական փոխներգործության մակարդակի զգալի բարձրացում, նախկին խորհրդային հանրապետությունների լայն ինտեգրացիա ԵՄ տնտեսության մեջ ու նրանց տրամադրվող ֆինանսական օգնության ծավալների մեծացում։
Նշենք, որ չնայած եվրապատգամավորների արտաքուստ «հանգստացնող» տրամադրությանը, բազում փորձագետների կարծիքով` «Արևելյան գործընկերությունն» ի սկզբանե ուղղված է եղել Արևելյան Եվրոպայում Ռուսաստանի աշխարհաքաղաքական ազդեցության թուլացմանը։
