ԵՐԵՎԱՆ, 6 մարտի — Sputnik. Հայաստան– ԵՄ հարաբերություններում աննախադեպ վիճակ է։ Այսօր ԱԺ–ում պատգամավորների հետ հարցուպատասխանի ժամանակ հայտարարեց ՀՀ վարչապետ Նիկոլ Փաշինյանը` ներկայացնելով իր բրյուսելյան այցի մանրամասները։
«Առաջին անգամ է, որ ԵՄ–ն ժողովրդավարության իրավիճակի մասին ընդհանրապես հարցեր չունի Հայաստանի Հանրապետությանը»,– ասաց նա` հավելելով, որ ԵՄ–ում չեն կասկածում Հայաստանի կառավարության` ժողովրդավարական փոփոխությունները մինչև վերջ տանելու վճռականությանը։
Եվրամիությունը, Փաշինյանի խոսքով, պատրաստ է ֆինանսապես աջակցել Հայաստանում տեղի ունեցող փոփոխություններին։
«Ֆինանսական աջակցությունը մենք քննարկում ենք կապիտալ ներդրումների ու քաղաքական ենթակառուցվածքների համատեքստում»,– ասաց վարչապետը` հավելելով, որ ԵՄ–ն ՀՀ կառավարության առաջ համաֆինանսավորման պայման է դնում։
Հետևաբար ՀՀ իշխանության առաջ խնդիր է դրված պետական բյուջեի հաշվին կատարել ֆինանսական հատկացումները կամ մեծացնել պետական պարտքը։
Այս հարցում, նրա խոսքով, ՀՀ իշխանությունը պետք է քաղաքական որոշում կայացնի։
