ԵՐԵՎԱՆ, 3 հուլիսի — Sputnik. Այն, որ Հայաստանից և դեպի Հայաստան պետք է թռիչքներ ունենան Հայաստանի դրոշով օդանավեր, ՀՀ վարչապետ Նիկոլ Փաշինյանի համար կասկածից վեր է: Այս մասին վարչապետն ասել է իր մոտ տեղի ունեցած խորհրդակցության ժամանակ, որի ընթացքում քննարկվել է ՀՀ քաղաքացիական ավիացիայի զարգացմանը, ոլորտում առկա խնդիրների լուծմանը վերաբերող հարցեր` տեղեկանում ենք վարչապետի պաշտոնակն կայքից։
«Այսօր հավաքվել ենք քննարկելու ՀՀ քաղավիացիայի զարգացման հայեցակարգային ծրագրի նախագիծը, որպեսզի կողմնորոշվենք, թե ինչ ռազմավարական ուղղություն ենք որդեգրում ՀՀ–ում քաղավիացիայի զարգացման բնագավառում: Նախկինում մի քանի անգամ առիթ եմ ունեցել ասելու, որ ժամանակակից աշխարհում գործուն ազգային ավիաընկերություններ ունենալը պետական ատրիբուտիկայի կարևոր բաղադրիչ է»,–ասել է Փաշինյանը։
Նրա խոսքով` բոլորի նպատակը և ցանկությունը ավիացիոն շուկայում հայկական, հայաստանյան ընկերություններ ունենալն է:
ՀՀ–ն օդային հաղորդակցությունն արդյունավետ կազմակերպելու կարևոր դեր ունի. Սուրեն Պապիկյան
Ըստ վարչապետի` նպատակին հասնելու համար անհրաժեշտ է իրականացնել հաշվարկված, մտածված և հետևողական քայլեր. «Մեր խնդիրը պետք է լինի չխաթարել քաղավիացիայի բնականոն գործունեությունը և համոզված լինել, որ կայացրած որոշումների և որդեգրված քաղաքականությունների արդյունքում մենք չենք ունենալու այն նույն իրավիճակը, ինչ ունեցել ենք «Հայկական ավիաուղիներ» և «Արմավիա» ավիաընկերությունների դեպքում, որոնց ճակատագիրը, որոնց հետ տեղի ունեցածը հսկայական հարված է հասցրել Հայաստանի քաղավիացիային և այս ոլորտում ՀՀ ինքնավստահությանը:
Եվ սա պետք է խոստովանել: Բայց մյուս կողմից, մեր ռազմավարական նպատակը պետք է լինի հայկական ավիաընկերությունների գոյությունը, որոնք շուկայում լինեն մրցունակ և կարողանան մրցակցել իրար և միջազգային իրենց մրցակիցների հետ: Դա մեզ համար աներկբա է: Մենք պետք է հաշվարկված, մտածված և հետևողական քայլերով ընթանանք դեպի այդ նպատակի իրագործումը: Ես համարում եմ, որ այսօրվա քննարկումը այդպիսի ճանապարհի մեկնարկն է»,-ընդգծել է կառավարության ղեկավարը»:
Խորհրդակցության ընթացքում ներկայացվել է ՀՀ քաղավիացիայի զարգացման հայեցակարգի նախագիծը:
Խորհրդակցության մասնակիցները ներկայացրել են իրենց դիտարկումներն ու համապատասխան առաջարկությունները հայեցակարգի նախագծի վերաբերյալ։
Փաշինյանը հանձնարարել է պատկան գերատեսչությունների ղեկավարներին շարունակել քննարկումները ներկայացված առաջարկությունների շուրջ:
