ԵՐԵՎԱՆ, 29 հունիսի – Sputnik, Գոռ Մարգարյան. Այս շաբաթ պարզվեց, որ Lightyear ընկերությունը լուրջ մարտահրավեր է նետում Tesla-ին, սմարթֆոն արտադրող ընկերությունները մեզ նենգաբար խաբում են, իսկ Gucci–ն առաջարկում է լուսանկարվել վիրտուալ կոշիկով: Հիմա ամեն ինչի մասին` հերթով։
Թանկ կոշիկներով հնարավոր է նկարվել առանց տանից դուրս գալու
Gucci նորաձևության տունը թողարկել է իր սեփական հավելվածը iOS հարթակի համար, որը թույլ է տալիս գնորդներին լրացուցիչ իրականության մեջ փորձարկել Ace հավաքածուի սպորտային կոշիկները:
AR-ի մեջ հնարավոր է ընտրել և փորձել Ace հավաքածուի բոլո՛ր կոշիկները` ամենասովորականից մինչև մարգարիտով զարդարված: Ասեմ ավելին՝ Gucci-ին վստահեցնում է` այս գործիքով հնարավոր է գտնել և փորձել նույնիսկ այն մոդելը, որը դեռ չի թողարկվել: Հավանած մարզակոշիկը հնարավոր է գնել հենց հավելվածի միջոցով, իսկ եթե դեռևս հնարավորություն չունեք ձեռք բերել նորույթը, ապա կարող եք վիրտուալ կոշիկով լուսանկարվել և տեղադրել սոցցանցերում: Դրանից հետո ձեր ընկերները թող նախանձեն ու փորձեն գուշակել, թե որտեղից ձեզ այդքան փող, որ կարողանում եք նման շքեղություն թույլ տալ:
Այս նորամուծությունը կարող է հեղափոխական դառնալ շուկայական հարաբերություններում: Նախ՝ կոշիկ փորձելու համար վերանում է խանութ- սրահ այցելելու անհրաժեշտությունը, երկրորդն էլ՝ մաքսիմալ կրճատվում է հաճախորդ-վաճառող հարաբերությունները, ինչը թույլ է տալիս խուսափել վատ սպասարկումից ու նյարդայնանալուց: Ասածս ի՞նչ է, հուսանք, որ մյուս նորաձևության տները և, ինչու ոչ, պակաս հայտնի ապրանքանիշները կհետևեն Gucci-ի օրինակին ու նման բան կներկայացնեն մեզ մոտ ապագայում՝ խնայելով մեր նյարդերն ու իրենց փողերը:
Հավելվածը կարող եք ներբեռնել՝ այցելելով այս հղմամբ:
LG-ն իր նոր մոդելը գովազդել է այն լուսանկարով, որը երևացել էր մեկ այլ սմարթֆոնի գովազդային արշավի ժամանակ
Մեզ իրենց մատների վրա պտտեցնելը շատ լավ է ստացվում սմարթֆոն արտադրող ընկերությունների մոտ: Բոլորդ էլ երևի նկատել եք, որ ընկերություններն իրենց արտադրանքը գովազդելիս օգտագործում են չափից դուրս որակյալ լուսանկարներ՝ հայտարարելով՝ իբր դրանք արված են այս կամ այն սմարթֆոնով:
Հիմա անցնենք բուն նյութին: LG-ն պատրաստվում է մոտ ապագայում թողարկել իր նոր W մոդելի սմարթֆոնը: Գովազդային արշավի ընթացքում դիմային տեսախցիկին հատկացված բաժնում ընկերությունն օգտագործել է երեք լուսանկար, որոնցից մեկը ժամանակին երևացել է Nokia 8.1 սմարթֆոնի գովազդում: Խաբեությունը նկատել է Twitter-ի օգտատերերից մեկը:
Wow Nokia and LG are literally using the same pic for promoting their device’s camera. Even though there is no mention that these are camera samples but yes, it’s still definitely misleading. I really wish brands start keeping integrity like Apple.
— Ishan Agarwal (@ishanagarwal24) 26 июня 2019 г.
Credits: @RahatSharma20 pic.twitter.com/CRTJh2jPzz
Սա ապացուցում է այն կասկածը, որ լուսանկարների մեծ մասը սմարթֆոնով չեն նկարում. ընկերությունները դիմում են պրոֆեսիոնալ լուսանկարիչների օգնությանը, նրանք էլ որակյալ լուսանկարներ են անում: Ասեմ, որ երկու ընկերություններն էլ առայժմ չեն մեկնաբանել այս բացահայտումը։
Facebook-ի նոր սիմուլյատորը կսովորեցնի ռոբոտին կողմնորոշվել տեղանքում
Կարծում եմ՝ բոլորս էլ երազել ենք կամ երազում ենք ռոբոտ-սպասավորի մասին, որը կշտապի մեր առաջ բացել դուռը, կօգնի ընթրիք պատրաստել, թայվանական մերսումներ կանի կամ էլ ուղղակի կլվա գուլպաները: Գրեթե վստահ եմ, որ շատ մոտ ապագայում այս ամենը հնարավոր կլինի, բայց նախ նման ռոբոտին պետք է սովորեցնել տնային պայմաններում տեղաշարժվել, չէ՞ որ մեր իսկ տարածքում երբեմն կորցնում ենք կողմնորոշումը և խփվում դռներին ու կահույքին: Եթե անկեղծ լինեմ, այս հարցում մայրս, անկասկած, կարող է «աշխարհի չեմպիոն» համարվել: Դե, պատկերացրեք նույն իրավիճակում հայտնված ռոբոտներին, որոնք զուրկ են ինքնապահպանման բնազդից: Հենց սրա համար էլ Facebook-ը անհավանական իրական սիմուլյատոր է ստեղծել, որի նպատակն է արհեստական բանականությանը սովորեցնել շարժվել շինության տարածքում:
Սիմուլյատորը ստացել է Replica անվանումը և պարունակում է գրասենյակների ու բնակարանների 18 ռեալիստական օրինակ: Ընկերությունը սիմուլյատորը տեղադրել է GitHub կայքում:
Սիմուլացված բնակարանների շնորհիվ արհեստական բանականությունը պետք է սովորի շարժվել մեր իրականության մեջ և կատարել առաջադրանքներ: Դրանք կարող են պարզունակ թվալ, օրինակ՝ ստուգիր նոթբուքը սեղանի վրա՞ է, թե՞ ոչ: Այս առաջադրանքը կատարելու համար Replica-ն պետք է կարողանա տարբերել աթոռը նոթբուքից, դրանք տարբերակի որպես առանձին առարկաներ:
Դե ինչ, սպասենք, տեսնենք՝ երբ ռոբոտներն իրենց խելացի արհեստական բանականության օգնությամբ մեր կյանքն ավելի կհեշտացնեն:
Արևամեքենան շուկայում կհայտնվի մոտ ապագայում
Դժվար է գտնել այնպիսի մարդու, որ հետևում է Tesla ընկերության նորություններին և հիացած չէ ընկերության առաջընթացով: Այս պահին Tesla-ն էլեկտրական մեքենաների շուկայի առաջատարն է, սակայն Իլոն Մասկին մարտահրավերներ նետողների քանակն օրեցօր ավելանում է: Հոլանդական Lightyear ընկերությունը ներկայացրել է 5 տեղանոց էլեկտրամեքենայի՝ Lightyear One-ի նախատիպը, որի տանիքին և շարժիչի ծածկին տեղադրված են արևային վահանակներ։ Դրանք մեքենան կլիցքավորեն անմիջապես ընթացքի ժամանակ:
Այս մասին տեղեկացել եմ ավտոմեքենայի պաշտոնական կայքից:
Բայց սա միակ նորությունը չէ։ Արևասեր մեքենայի կարևորագույն առանձնահատկությունը կուտակած էներգիայի պաշարի աննախադեպ ծավալն է: Այս ցուցանիշով հոլանդացի ինժեներները գերազանցել են բոլոր մրցակիցներին:
Այս գեղեցկուհու համար ընկերությունն արդեն նախապատվերներ է ընդունում: Առաջին 500 օրինակից մեկի երջանիկ սեփականատերը դառնալու համար հավանական գնորդը պետք է վճարի 119 000 եվրո, իսկ այդ 500 ավտոմեքենան սպառելուց հետո ավտոմեքենայի արժեքը ընկերությունը սահմանել է ավելի բարձր՝ 149 000 եվրո: Այս ցուցանիշով ամերիկյան առաջատարը շատ հեռու չէ իր եվրոպացի մրցակցից. Tesla-ն իր Long Range S մոդելը վաճառում է 125 հազար եվրոյով: Առաջին հայացքից վախեցնող թվեր են, բայց, երբ գիտակցում ես, որ այդ ոչ փոքր գումարով դու ձեռքս ես բերում «արևամեքենա» և մեկ քայլով ևս մոտենում ապագային, թվերը կորցնում են իրենց նշանակությունը:
Ապագայի մեքենան մասսայական արտադրության կհանվի 2021 թվականին:
Տեղեկատվական տեխնոլոգիաների և նորարարությունների ոլորտում շաբաթվա ընթացքում այլ իրադարձություններ էլ են տեղի ունեցել, որոնց մասին մենք արդեն գրել ենք, այնպես որ խորհուրդ կտամ կարդալ ևս մի քանի լուր, որոնք չեն վրիպել մեր աչքից։
«Գահերի խաղը» հանգիստ չի տալիս մարդկանց. սերիալի մոտիվներով նոր խաղ է ստեղծվել
Mail.ru–ն հրաժարվում է գաղտնաբառերից
Սմարթֆոնների «մարդասպանը» պատրաստ է. սարքը 64-մեգապիքսելանոց տեսախցիկ ունի
