ԵՐԵՎԱՆ, 28 հունիսի — Sputnik. «Անգամ թուրքը չի կարողացել գեներալ Մանվել Գրիգորյանի մայրիկը լացացնել»: Այս մասին այսօր լրագրողների հետ զրույցում ասաց Գրիգորյանի պաշտպան Լևոն Բաղդասարյանը:
Նա նշեց, որ Մարտի 1-ի տուժողի ներկայացուցիչ Սեդա Սաֆարյանը հայտարարել էր, որ կա փաստաթուղթ, որտեղ նշված է՝ Մարտի 1-ից առաջ, երբ Քոչարյանը խորհրդակցություն է հրավիրել, Գրիգորյանը չի մասնակցել դրան:
«Գրիգորյանն այդ խորհրդակցությանը չի մասնակցել, քանի որ գիտեր՝ ինչ անօրինականություններ անելու մասին կարող էր խոսք գնալ: Սաֆարյանն ասում է, որ փաստաթղթում ֆիքսված է՝ Քոչարյանը Գրիգորյանի բացակայության մասին ասել է, թե՝ տեսեք, մայրիկն ինչպես եմ լացացնելու: «Մայրիկ լացացնելն» իրավական կատեգորիա չէ, անգամ թուրքը չի կարողացել նրա մայրիկը լացացնել»,-ասաց պաշտպանը:
Պաշտպանն, ի դեպ, այս թեմայի մասին Գրիգորյանի հետ չի խոսել, քանի որ, ինչպես հայտնեց նա, բժիշկները հորդորել են նրան շատ հարցեր չտալ:
Բաղդասարյանը հավաստիացրեց նաև, որ Գրիգորյանը Մարտի 1-ի գործով բացատրություն կամ ցուցմունք չի տվել: Գրիգորյանին, պաշտպանի խոսքով, հրավիրել են ցուցմունք տալու, սակայն նա, օգտվելով իր իրավունքից, հրաժարվել է:
Դատական իշխանությունը գործադիրի կոշիկի տակ է. Մանվել Գրիգորյանի պաշտպան
Հարցին, թե Գրիգորյանն այդ թեմայով արդյո՞ք ասելիք ունի՝ պաշտպանը պատասխանեց, որ մեկն, ով Մարտի 1-ի ժամանակ պաշտպանության փոխնախարար է եղել, ինչպես կարող է ասելիք չունենար:
Բաղդասարյանի խոսքով՝ եթե Գրիգորյանը Մարտի 1-ի գործով ցուցմունք տար, ապա այն դրականորեն կազդեր նրա դեմ հարուցված ներկայիս քրգործի վրա:
«Թե՛ առաջին, թե՛ երկրորդ, թե՛ երրորդ նախագահների ժամանակ էլ եղել են դեպքեր, որ ցանկացել են նրա մայրիկը լացացնել, բայց չի ստացվել: Մարտի 1-ի գործով իրավիճակն այսպիսին էր՝ կամ նա պետք է ժողովրդի կողքին կանգներ, կամ գնար Քոչարյանի հետ խորհրդակցության: Ինչպես ասում է Սեդա Սաֆարյանը, Գրիգորյանը հայտնի խորհրդակցությանը չի մասնակցել››,-ասաց նա:
Հիշեցնենք, որ Գրիգորյանը մեղադրվում է 6 հոդվածով` ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակությունը կազմակերպելու մեջ:
Անվասայլակով ու թթվածնի սարքով. Մանվել Գրիգորյանը ներկա է դատական նիստին
Նրան մեղադրանք է առաջադրվել 2018 թ. հունիսի 19-ին։
