ԵՐԵՎԱՆ, 25 հունիսի — Sputnik. Երևանի ընդհանուր իրավասության դատարանի Կենտրոն նստավայրում ԵԿՄ նախկին նախագահ, ԱԺ նախկին պատգամավոր Մանվել Գրիգորյանի և նրա կնոջ՝ Նազիկ Ամիրյանի գործով հերթական դատական նիստը հետաձգվեց։ Այս մասին հայտարարեց նիստը նախագահող դատավոր Մնացական Մարտիրոսյանը։
Ինչպես արդեն հայտնել էինք, Գրիգորյանն այսօր մասնակցում էր իր դեմ հարուցված քրգործով դատական նիստին։
«Հաջորդ դատական նիստը տեղի կունենա հուլիսի 2-ին, ժամը 12–ին»,–ասաց դատավորը։
Մինչ այդ Գրիգորյանն ասաց, որ ոտքերն ուռել են, և նրա պաշտպան Լևոն Բաղդասարյանն էլ դատարանին հայտնեց, որ բժիշկների ցուցումով Գրիգորյանը պետք է պառկի։ Հենց այս պատճառով էլ դատական նիստը հետաձգվեց։
Հիշեցնենք, որ Գրիգորյանը դատարան է տեղափոխվել շտապօգնության մեքենայով. դատական նիստերի դահլիճում նա անվասայլակի միջոցով էր տեղաշարժվում։ Նրա ինքնազգացողությունն, ի դեպ, դատական նիստի ժամանակ վատացել էր, և նիստը մի քանի անգամ ընդմիջվել էր։
Դատախազն առաջարկում է Մանվել Գրիգորյանի համար բժշկական նոր փորձաքննություն նշանակել
Մանվել Գրիգորյանի պաշտպաններից Լևոն Բաղդասարյանը միջնորդել էր արգելանքից հանել Գրիգորյանի կենսաթոշակը: Դատարանը բավարարել էր միջնորդությունը։
Գրիգորյանը մեղադրվում է 6 հոդվածով` ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակությունը կազմակերպելու մեջ:
Նրան մեղադրանք է առաջադրվել 2018 թ. հունիսի 19-ին։
Դատական իշխանությունը գործադիրի կոշիկի տակ է. Մանվել Գրիգորյանի պաշտպան
