ԵՐԵՎԱՆ, 25 հունիսի — Sputnik. ՀՀ երկրորդ նախագահ Ռոբերտ Քոչարյանը կարծում է, որ մարդու ճակատին է գրված լինում, որ նա դուխով է, ոչ թե գլխարկին: Այս մասին Քոչարյանն ասաց 5-րդ ալիքի հետ հարցազրույցի ժամանակ:
«Եթե փողոցում տեսնեք մեկին, որի գլխարկի վրա գրված է, թե՝ ես խելոք եմ, ինչ եք մտածելու այդ մարդու մասին: Ես մտածելու եմ, որ ապուշ է: Մարդու ճակատին է գրված լինում, որ նա դուխով է, ոչ թե գլխարկին: Տեսակի խնդիր կա»,-ասաց նա
Քոչարյանն անդրադարձավ իր դեմ հարուցված քրեական գործին ու Արցախի երկու նախագահների՝ դատարան ներկայացրած անձնական միջնորդությանը՝ իր խափանման միջոց կալանքը փոխելու համար: Նրա խոսքով՝ ասում են, որ իր դատավարությունը քաղաքական չէ, և եթե քաղաքական չէ, ինչպես են դիտարկում Արցախի նախագահների միջնորդությունը որպես միջամտություն Հայաստանի ներքաղաքական հարցերին: Արցախի նախագահների միջնորդությունը, ըստ նրա, ոչ թե պաշտոնի, այլ մարդու միջնորդություն էր:
«Արցախի նախագահը չի ներկայացրել նամակ Արցախի նախագահի գրասենյակի անունից ու վճարել է 500 000 դրամ ոչ թե Արցախի պետբյուջեից, այլ իր անձնական գրպանից... Խնդիրն այն է, որ իրենց համար հասկանալի չէ մարդկանց տեսակը, հաղթանակած մարդկանց տեսակը, նրանք փորձում են այդ մարդկանց հեռու պահել ամեն ինչից: Դա դասական դասալիքների բարդույթի արտահայտություն է»,-ասաց նա:
Նրա խոսքով՝ իր մոտ այնպիսի տպավորություն է, որ ՀՀ իշխանությունն Արցախից որոշակի վտանգ է տեսնում, քանի որ տեսնում է, որ Արցախում այնպիսի մարդիկ են իշխանության գլխին, որոնք իրենց տեսակի հետ չեն «բռնում»: Ուստի, ըստ Քոչարյանի, փորձում են նվաստացնել նրանց, ովքեր այդ տեսակին են պատկանում՝ ով չի լքել ու չի փախել: «Նրանք փորձում են ազատվել այդ տեսակ մարդկանցից, սակայն դրանով Ղարաբաղի անվտանգությանն են վնասում, քանի որ անվտանգությունը խարսխված է այդ տեսակի վրա»,-ասաց ՀՀ երկրորդ նախագահը:
Հիշեցնենք, որ Երևանի ընդհանուր իրավասությունների Ավան և Նոր Նորք վարչական շրջանների դատարանը՝ դատավոր Դավիթ Գրիգորյանի նախագահությամբ, մարտի 18-ին որոշում էր կայացրել Ռոբերտ Քոչարյանի նկատմամբ կիրառված խափանման միջոց կալանքը փոխարինել ազատությունից զրկելու հետ չկապված խափանման միջոցով` Արցախի գործող ու նախկին նախագահների անձնական երաշխավորությամբ։
Մայիսի 20–ին ՀՀ երկրորդ նախագահ Ռոբերտ Քոչարյանի, ՀՀ նախկին փոխվարչապետ Արմեն Գևորգյանի, Պաշտպանության նախկին նախարար Սեյրան Օհանյանի և ՀԱՊԿ նախկին գլխավոր քարտուղար Յուրի Խաչատուրովի վերաբերյալ գործի վարույթը դատարանի որոշմամբ կասեցվել է և ուղարկվել Սահմանադրական դատարան:
