Դատաիրավական համակարգի բարեփոխումները մեր երկրում ծառայում են քաղական մեկ նպատակի՝ այն է գործող վարչապետի անձնական իշխանության մաքսիմալ ամրապնդմանը։ Sputnik Արմենիայի հետ զրույցում ասել է Պոլիտէկոնոմիա վերլուծական կենտրոնի քաղաքական մեկնաբան Բենիամին Մաթևոսյանը։ Նա անդրադարձել է ՍԴ դատավոր ընտրված Վահե Գրիգորյանի՝ ինքն իրեն ՍԴ նախագահ հռչակելու հանգամանքին։
Քաղաքական վերլուծաբանի գնահատմամբ՝ իշխանության ոչ պաշտոնական «խոսափող» համարվող Գագիկ Ջհանգիրյանը հայտարարեց, որ Ռոբերտ Քոչարյանի գործը ՍԵԴ-ն չի քննելու այն կազմով, որը կար մինչև Վահե Գրիգորյանի ընտրությունը։
«Ակնհայտ է, որ Վահե Գրիգորյանին հապճեպ ՍԴ նախագահ կարգելու փորձը պայմանավորված է հենց երկրորդ նախագահի գործով»,-ասել է Մաթևոսյանը։
Ըստ քաղաքագետի՝ իշխանությունը փորձում է բոլոր հնարավոր միջոցները կիրառել Քոչարյանի դեմ՝ նրան բանտում փակելու համար։
Քաղաքագետը դժվարանում է ասել՝ ՍԴ գործող նախագահ Հրայր Թովմասյանը կկարողանա օրինականության սահմանում պահել իր պաշտոնը, թե կընկրկի և հրաժարական կտա։ Ամեն դեպքում, ըստ Բենիամին Մաթևոսյանի, Ռոբերտ Քոչարյանի և մյուսների գործը Սահմանադրական դատարանը կքննի օրեր անց, և հենց մի քանի օրից էլ պարզ կդառնա Հրայր Թովմասյանը կկարողանա պայքարել իշխանությունների դեմ, թե ոչ։
