ԵՐԵՎԱՆ, 22 հունիսի - Sputnik. Հայաստանի կոմպոզիտորների միության անդամ, ՀՀ ժողովրդական արտիստ, կոմպոզիտոր Ստեփան Շաքարյանը մահացել է։ Այս մասին հայտնում է Հայաստանի կոմպոզիտորների միությունը։
«Խորին ցավով տեղեկացնում ենք, որ մահացել է ՀԿՄ անդամ, ՀՀ ժողովրդական արտիստ, կոմպոզիտոր Ստեփան Շաքարյանը։ Հոգեհանգստի և հուղարկավորության մանրամասները կտեղեկացվի ավելի ուշ»,– նշված է հաղորդագրության մեջ:
Շաքարյանը ծնվել է 1935 թվականի հոկտեմբերի 23-ին։ Երևան էր տեղափոխվել 1952թ. ծննդավայր Բաքվից, 2 տարի անց ընդունվել Երևանի Կոմիտասի անվան պետական կոնսերվատորիա: Հայտնի կոմպոզիտոր Արամ Խաչատրյանը նկատեց երիտասարդի տաղանդն ու հրավիրեց տեղափոխվել Մոսկվայի Գնեսինների անվան ինստիտուտ, այնուհետև Լենինգրադի կոնսերվատորիա: Ուսումն ավարտելուց հետո 1964թ.-ին նա վերադարձավ Երևան ու սկսեց երաժշտական և կազմակերպչական ակտիվ գործունեությամբ զբաղվել: 1960-ականներին ստեղծեց Երևանի Մշակույթի պալատին կից «Պատանեկություն» խումբը:
Մեծ է Շաքարյանի ներդրումը հայկական ջազի պատմության մեջ, նրան համարում են հայկական ջազի հիմնադիրներից մեկը: 1965թ. երևանյան ջազային փառատոնի ժամանակ նա արժանացել է ոսկե մեդալի: 1986-1990 թթ. Եղել է ՀՀ ռադիոպետկոմի մենակատարների ջազ-անսամբլի հիմնադիր-ղեկավար։
Շաքարյանը հեղինակել է ավելի քան 100 ջազային կոմպոզիցիաներ, որոնք ներառվել են հայկական տարբեր ջազային կոլեկտիվների նվագացանկերում: Մշակել է հայկական ժողովրդական երգեր՝ դրանց հաղորդելով ջազային յուրօրինակ շունչ: «Բինգյոլից մինչև Կանզաս սիթի» ստեղծագործությունը դարձել է հայկական ջազի ստանդարտ: Նրա սիմֆոնիաները և կոնցերտները կատարել են հայ և այլազգի բազմաթիվ կատարողներ:
Երակներով հոսող ջազն ու Ազնավուրը․ Քյոսայանը գիտի` ինչու են հայերը հաջողության հասնում
2009թ. արժանացել է Հայաստանի արվեստի վաստակավոր գործչի կոչման և պարգևատրվել ՀՀ մշակույթի նախարարության, 2015թ.՝ Երևանի քաղաքապետարանի ոսկե մեդալներով: 2017-ին արժանացել է ՀՀ ժողովրդական արտիստի կոչման:
Ֆրանսիական ջազի մաեստրոն. ինչպես Անդրե Էքյանը հրաժարվեց Ամերիկայից
